కొంతమంది కలలు కంటున్నారు: బాబు, జగన్‌పై విహెచ్

By Srinivas

Published: Friday, March 9, 2012, 15:43 [IST]

మహబూబ్‌నగర్: తెలుగుదేశం, వైయస్సార్ కాంగ్రెసు, తెలంగాణ రాష్ట్ర సమితి పార్టీలపై కాంగ్రెసు పార్టీ సీనియర్ నేత వి హనుమంత రావు శుక్రవారం తీవ్రస్థాయిలో విరుచుకు పడ్డారు. ఎన్నిసార్లు రాజీనామాలు చేసి తిరిగి గెలిచినప్పటికీ తెరాసకు తెలంగాణ తెచ్చే సత్తా లేదని విమర్శించారు. ఉప ఎన్నికల్లో కాంగ్రెసు పార్టీ అభ్యర్థులే విజయం సాధిస్తారని ఆయన ఆశాభావం వ్యక్తం చేశారు. ఉత్తర ప్రదేశ్ ఫలితాలు చూసి కొంతమంది కలలు కంటున్నారని పరోక్షంగా తెలుగుదేశం పార్టీ అధినేత నారా చంద్రబాబు నాయుడు, వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిని ఉద్దేశించి అన్నారు. యుపిలో సైకిల్ గుర్తు గెలవడంతో ఇక్కడి టిడిపిలోనూ, ఎస్పీ విజయంలో యువకుడైన అఖిలేష్ పాత్ర ప్రధానంగా ఉండటంతో జగన్ పార్టీలోనూ ఒకింత ఉత్సాహం కనిపించిన విషయం తెలిసిందే. వైయస్ జగన్మోహన్ రెడ్డి వర్గంలో కొంతమంది జైలుకు వెళితే మరికొంతమంది కోర్టుల చుట్టూ తిరుగుతారని అన్నారు.

ఏఐసిసి ప్రధాన కార్యదర్శి రాహుల్ గాంధీకి పదవి రాకుండా సీనియర్లు అడ్డుకుంటున్నారని పాలడుగు వెంకట్రావు వేరుగా ఆరోపించారు. రాహుల్ గాంధీని మంత్రి వర్గంలోకి తీసుకుంటే యుపిలో మంచి ఫలితాలు వచ్చి ఉండేవన్నారు. పార్టీని నడపరాకుంటే పదవులు వదులుకోవాలని తప్ప రాహుల్ ను ఇబ్బంది పెట్టవద్దని అన్నారు. ఐదు రాష్ట్రాల ఎన్నికల్లో ఓటమికి తామే బాధ్యులమని రాహుల్ గాంధీ, అధినేత్రి సోనియా గాంధీ చెప్పడం వారి గొప్పతనానికి నిదర్శనమన్నారు.

Published On March 9, 2012