ఫలితాలు ప్రభావం చూపవు, ఎంపీలు దూరంలేరు: బొత్స

By Srinivas

Published: Sunday, March 11, 2012, 16:37 [IST]

మహబూబ్‌నగర్: ఉప ఎన్నికల ఫలితాలు ప్రభుత్వంపై ఎలాంటి ప్రభావం చూపవని ప్రదేశ్ కాంగ్రెసు కమిటీ అధ్యక్షుడు, రవాణా శాఖ మంత్రి బొత్స సత్యనారాయణ ఆదివారం అన్నారు. ఉప ఎన్నికల్లో తెలుగుదేశం పార్టీకి నాలుగో స్థానమే వస్తుందని ఆయన అన్నారు. తాము అభివృద్ధి, సంక్షేమ పథకాలతో ప్రజల్లోకి వెళ్తామన్నారు. అవే తమ ఎన్నికల ప్రచార అస్త్రాలు అని చెప్పారు. విద్యుత్ ను కొనుగోలు చేసి రైతులకు ఎలాంటి ఇబ్బంది రాకుండా సరఫరా చేస్తామని అన్నారు. ఆయన మహబూబ్ నగర్ జిల్లాలో నేడు ఎన్నికల ప్రచారంలో పాల్గొన్నారు. ఈ సందర్భంగా ఆయన మాట్లాడారు. స్థానిక సంస్థల ఎన్నికలు ఏప్రిల్ లో నిర్వహిస్తామని ఆయన చెప్పారు. ముందు సహకార ఆ తర్వాత మున్సిపల్ అటు తర్వాత పంచాయతీ ఎన్నికలు నిర్వహిస్తామని చెప్పారు. ఎంపీలెవరూ ప్రచారానికి దూరంగా లేరని అందరూ పాల్గొంటున్నారని బొత్స చెప్పారు. ప్రస్తుతం అంతా సర్దుకుందని అన్నారు. ఏడు నియోజకవర్గాలలో అందరం ప్రచారం చేస్తామని చెప్పారు.

కాగా ముఖ్యమంత్రి కిరణ్ కుమార్ రెడ్డి ఎన్నికల ప్రచార షెడ్యూల్ ఖరారు అయింది. ఈ నెల 13వ తేదిన కొల్లాపూర్, నాగర్ కర్నూల్, 14వ తేదిన కామారెడ్డి, అదిలాబాద్, 15న నాగర్ కర్నూలులో ముఖ్యమంత్రి ప్రచారం చేయనున్నారు. కాగా ఈ నెల 18వ తేదిన తెలంగాణ ప్రాంతంలోని ఆరు, శ్రీ పొట్టి శ్రీరాములు నెల్లూరు జిల్లాలోని కొవూరు నియోజకవర్గాలలో ఉప ఎన్నికలు జరగనున్నాయి. 21న ఫలితాలు వెలువడుతాయి.

Published On March 11, 2012