ఒబామా యంత్రాంగంలో మరో ఇద్దరు భారతీయులు

By Srinivas

Published: Thursday, March 15, 2012, 17:43 [IST]

వాషింగ్టన్: అమెరికా పరిపాలన వ్యవస్థలో కీలక పాత్ర పోషించే భారతీయుల సంఖ్య చాలానే ఉంది. ఈ నేపథ్యంలో మరో ఇద్దరు భారతీయులను కీలక పదవుల్లో నియమించినట్టు ఆ దేశ అధ్యక్షుడు బరాక్ ఒబామా ప్రకటించారు. దీంతో ఒబామా యంత్రాంగంలో మరో ఇద్దరు భారతీయ అమెరికన్లకు అత్యున్నత పదవులు దక్కినట్టయింది. జాతీయ ప్రదర్శనశాల, గ్రంథాలయ సేవల మండలి సభ్యురాలిగా పౌలా గంగోపాధ్యాయను, జాతీయ ఆహార వ్యవసాయ సంస్థ డైరెక్టర్‌గా సోనీ రామస్వామిని నియమిస్తున్నట్లు అధ్యక్షుడు లాంఛనంగా ప్రకటించారని వైట్ హౌస్ శనివారం తెలిపింది.

గంగోపాధ్యాయ ప్రస్తుతం హెన్రీ ఫోర్డ్ లో చీఫ్ లెర్నింగ్ అధికారిగా పని చేస్తున్నారు. రామస్వామి ఒరెగాన్ స్టేట్ విశ్వవిద్యాలయంలో వ్యవసాయ శాస్త్రాల కళాశాల డీన్ గా, ఒరెగాన్ వ్యవసాయ ప్రయోగ కేంద్రానికి సంచాలకుడిగా వ్యవహరిస్తున్నారు. కాగా వీరంతా తమ అనుభవాన్ని, ప్రతిభనూ రంగరించి తాము కొత్తగా చేపట్టబోయే పదవులకు వన్నె తెస్తారని ఒబామా పేర్కొన్నారు.

Published On March 15, 2012