దూరం అంటే సై: కెసిఆర్‌కు రేవంత్, కొత్తకోట సవాల్

By Srinivas

Published: Tuesday, March 13, 2012, 12:18 [IST]

మహబూబ్ నగర్: తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావుకు తెలుగుదేశం పార్టీ సీనియర్ శాసనసభ్యుడు కొత్తకోట దయాకర రెడ్డి సోమవారం సవాల్ విసిరారు. కెసిఆర్ మహబూబ్ నగర్ పార్లమెంటు సభ్యత్వానికి రాజీనామా చేస్తే తాను, తన భార్య కూడా ఎమ్మెల్యే పదవులకు రాజీనామా చేస్తామని ఆయన అన్నారు. తాను కెసిఆర్ పై పోటీకి సిద్దమన్నారు. ఆ తర్వాత ఎన్నికల్లో ఎవరు ఓడినా రాజకీయాలకు దూరంగా ఉండాలని అన్నారు. దానికి సిద్ధపడితే కెసిఆర్ తన సవాల్ స్వీకరించి రాజీనామా చేయాలన్నారు. తమ పార్టీ అధినేత నారా చంద్రబాబు నాయుడు రాజీనామాను కెసిఆర్ కోరటం సరికాదన్నారు. కెసిఆర్ మాటకారి కాదని పెద్ద మోసకారి అన్నారు. కెసిఆర్ తెలంగాణ ఐక్యత దెబ్బ తీస్తున్నారన్నారు.

జిల్లాకు చెందిన మరో నేత రేవంత్ రెడ్డి కూడా కెసిఆర్‌కు సవాల్ విసిరారు. చంద్రబాబు నాయుడును విమర్శించే కెసిఆర్‌కు పాలమూరులో సొంత ఊరు లేదు.. పార్లమెంటులో నోరు లేదని ఎద్దేవా చేశారు. ఉప ఎన్నికలతో తెలంగాణ రాకుంటే కెసిఆర్ తన పార్టీని ఎన్నికలకు దూరంగా ఉంచుతారా అని సవాల్ విసిరారు. తెలంగాణ రాకుంటే టిఆర్ఎస్ ఏ ఎన్నికల్లో పోటీ చేయవద్దన్నారు. దానికి కెసిఆర్ సిద్దపడితే తాను కూడా తెలంగాణ వచ్చే వరకు ఎన్నికల్లో పోటీ చేయనని అన్నారు. కెసిఆర్‌కు ఉప ఎన్నికలు ఉపాధి హామీ పథకం వంటివన్నారు. ఉద్యమం ముసుగులో ఉపాధి హామీ అమలు చే్స్తున్నారన్నారు. నీవు పాలమూరులో మమ్మల్ని సవాల్ చేయడమేమిటన్నారు.

Published On March 13, 2012