ఓట్లమ్ముకున్న చరిత్ర: కెసిఆర్‌పై బాబు, కాంగ్రెస్‌పైనా ఫైర్

By Srinivas

Published: Tuesday, March 13, 2012, 17:31 [IST]

అదిలాబాద్: శాసనమండలి ఎన్నికల్లో ఓట్లు అమ్ముకున్న చరిత్ర తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావుది అని తెలుగుదేశం పార్టీ అధినేత నారా చంద్రబాబు నాయుడు మంగళవారం విమర్శించారు. ఆయన అదిలాబాద్ జిల్లాలో తెలుగుదేశం పార్టీ అభ్యర్థి తరఫున ఎన్నికల ప్రచార బహిరంగ సభలో పాల్గొన్నారు. ఈ సందర్భంగా ఆయన కెసిఆర్, కాంగ్రెసుపై మండిపడ్డారు. తెలంగాణ సమస్యల పట్ల టిఆర్ఎస్ ఇప్పటి వరకు ఏం చేసిందో చెప్పాలని డిమాండ్ చేశారు. ఉప ఎన్నికల వల్ల తెలంగాణ రాదని ఆయన అన్నారు. ప్రభుత్వ పథకాలు పేదలకు అందడం లేదని, రాష్ట్రాన్ని కాంగ్రెసు పార్టీ ఇరవై ఏళ్లు వెనక్కి తీసుకు వెళ్లిందని విమర్సించారు. రాష్ట్రంలో టెక్నాలజీ పెరిగిందంటే అది నా చలువే అన్నారు. సారా అమ్మేవాళ్లు ప్రదేశ్ కాంగ్రెసు కమిటీ అధ్యక్షుడు అయితే ఎలా ఉంటుందో తెలుసుకోవాలన్నారు.

టిడిపిని ఏమైనా అంటే కాంగ్రెసు అడ్రస్ లేకుండా పోతుందన్నారు. రాష్ట్రానికి కాంగ్రెసు పాలన ఓ శాపం అన్నారు. అదిలాబాద్ టిడిపి హయాంలోనే అభివృద్ది చెందిందని, దీనిపై కాంగ్రెసు బహిరంగ చర్చకు సిద్ధమా అని సవాల్ విసిరారు. ఎంపిగా, మంత్రిగా కెసిఆర్ తెలంగాణకు చేసిందేమీ లేదన్నారు. ఆయన హయాంలోనే పుర్రె గుర్తు వచ్చి, బీడి కార్మికుల పొట్ట కొట్టిందన్నారు. టిఆర్ఎస్‌కు నీతి నియమాలు లేవన్నారు. ఎన్నికల పేరుతో కెసిఆర్ డబ్బులు దండుకుంటున్నారని విమర్శించారు. తన హయాంలోనే ఐటి అభివృద్ధి అన్నారు. పేదలకు సంక్షేమ పథకాలు అందటం లేదన్నారు. కాంగ్రెసు నేతలు దోచుకుంటూ రాజ్యమేలుతున్నారన్నారు. ఈ ప్రభుత్వాన్ని బంగాళాఖాతంలో కలపాలన్నారు. కెసిఆర్‌కు నోటు, సీటుకు తప్ప అభివృద్ధి పట్టదన్నారు. కాగా చంద్రబాబు తెలుగుదేశం పార్టీ నేత ఎర్రబెల్లి దయాకర రావును పరామర్శించేందుకు వరంగల్ బయలుదేరి వెళ్లారు.

Published On March 13, 2012