రూ.25 లక్షలు డిమాండ్ చేసిన ఎమ్మెల్యే కవిత?

By Srinivas

Published: Tuesday, March 13, 2012, 10:41 [IST]

హైదరాబాద్: వరంగల్ జిల్లా మహబూబాబాద్ శాసనసభ్యురాలు కవిత లిక్కర్ సిండికేట్ నుండి రూ.25 లక్షలు డిమాండ్ చేసినట్లుగా ఎసిబి రిమాండ్ రిపోర్టులో పేర్కొన్నట్లుగా తెలుస్తోంది. సిండికేట్ల కేసులో అరెస్టయిన పోలీసు అధికారులను రిమాండ్‌కు పంపుతూ ఎసిబి రూపొందించిన నివేదికలో ముడుపులలో కొత్తకోణం బయటపడిందని అంటున్నారు. మహబూబాబాద్ సిండికేట్ నుండి కవిత రూ.25 లక్షలు డిమాండ్ చేశారని, అంత ఇచ్చుకోలేమని వ్యాపారులు చేతులెత్తేశారని, దీంతో కవిత తరఫున పోలీసు అధికారి రాంప్రసాద్ రంగంలో దిగారని, ఈ సిండికేట్‌కు సంబంధించిన రెండు వైన్‌షాపులను వివిధ కారణాలు చూపించి మూయించారని, కవితతో మద్యం సిండికేట్ పెద్దలు రాజీ కుదుర్చుకున్న తర్వాతే షాపులు తెరిపించారని.. రాంప్రసాద్ రిమాండ్ రిపోర్టులో ఎసిబి పేర్కొన్నారని తెలుస్తోంది. రాంప్రసాద్‌కు ప్రతినెలా 45 వేల రూపాయలు అందేవని, దీనిని లక్షకు పెంచాలని ఆయన డిమాండ్ చేశారని ఎసిబి చెప్పినట్లుగా తెలుస్తోంది. రూ.6 లక్షల ముడుపులను బకాయిలు సహా ఆయన వసూలు చేసుకున్నారని వివరించింది.

ఇక హన్మకొండ మాజీ డిఎస్పీ వీరేశ్వరరావు, సుబేదారి సిఐ రణధీర్, ఖాజీపేట సిఐ విజయసారథి... మోహన్‌ రెడ్డి సిండికేట్ నుంచి నెలవారీ మామూళ్లు అందుకున్నారని రిమాండ్ రిపోర్టులో తెలిపినట్లుగా తెలుస్తోంది. ఆదిలాబాద్ ఓఎస్‌డి ఉమామహేశ్వరరావు, సిఐ శ్రీధర్ రావు... రమేశ్ రెడ్డి ద్వారా నెలకు 20వేల చొప్పున ముడుపులు అందుకున్నారని, కొన్ని నెలలు రూ.30వేలు కూడా తీసుకున్నారని వివరించింది. గతంలో మామునూరు డిఎస్పీగా పనిచేసిన వెంకటేశ్వరరావు పవన్ సిండికేట్ నుంచి నెలకు పాతికవేల చొప్పున రెండుసార్లు, 30వేల చొప్పున మూడుసార్లు మామూళ్లు తీసుకున్నట్లు ఎసిబి గుర్తించింది. వెంకటేశ్వరరావును శనివారం ఎసిబి అధికారులు ప్రశ్నించి వదిలివేశారు. వరంగల్ జిల్లాలో పనిచేసిన డిఎస్పీ జోగయ్య, సిఐలు శోభన్ కుమార్, వెంకటేశ్వర బాబులను సైతం ఎసిబి అధికారులు విచారించినట్లు సమాచారం. వీరిని కూడా అరెస్టు చేసేందుకు రంగం సిద్ధమైనట్లు తెలిసింది. మద్యం సిండికేట్ల నుంచి స్వాధీనం చేసుకున్న చిట్టాల ఆధారంగా నెలవారీ ముడుపులు తీసుకున్న పోలీసు అధికారుల జాబితాను ఎసిబి అధికారులు ఇప్పటికే సిద్దం చేశారు.

Published On March 13, 2012