జాతకాలు చెప్పే లగడపాటి ఒక్క పైసా తేలేదు: దేవినేని

By Srinivas

Published: Thursday, March 15, 2012, 12:58 [IST]

హైదరాబాద్: తెలుగుదేశం పార్టీ సీనియర్ శాసనసభ్యుడు, కృష్ణా జిల్లా పార్టీ అధ్యక్షుడు దేవినేని ఉమామహేశ్వర రావు గురువారం విజయవాడ పార్లమెంటు సభ్యుడు లగడపాటి రాజగోపాల్ పైన తీవ్రస్థాయిలో ధ్వజమెత్తారు. అందరి జాతకాలు హడావిడిగా చెప్పే లగడపాటి అధికార పార్టీ సభ్యుడు అయి ఉండి విజయవాడ రైల్వే స్టేషన్‌కు ఒక్క పైసా తీసుకు రాలేదని విమర్శించారు. బుధవారం జరిగిన ఇంటర్మీడియేట్ సెకండియర్ ఫిజిక్స్ పేపర్‌లో బ్లూ ప్రింటులో లేని ప్రశ్నలు వచ్చాయని విద్యార్థులు, తల్లిదండ్రులు అంటున్నారని, వారు ఈ అంశంపై ఆందోళన చెందుతున్నారని అన్నారు. దీనిపై మంత్రి పార్థసారథి వివరణ ఇవ్వాలని డిమాండ్ చేశారు.

మరోనేత పయ్యావుల కేశవ్ మంత్రుల పైన మండిపడ్డారు. వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆస్తుల కేసులో సుప్రీం కోర్టు నోటీసులు అందుకున్న మంత్రులు అప్రూవర్లుగా మారాలని సూచించారు. వివాదాస్పద జివోలు జారీ చేయడంలో ఎవరి ఒత్తిడి ఉందో వారు సిబిఐ ఎదుట వెల్లడించాలన్నారు. సామాన్యుడికి అందుబాటులో ఉండే వివరాలు శాసనసభలో పెట్టకుండా అధికార పార్టీ అసెంబ్లీని అవమానపరుస్తోందన్నారు. ఆ ఫైళ్లు పాలకుల ఆస్తి కాదని ప్రజల ఆస్తి అన్నారు. సభలో ఫైళ్లు పెడితే ప్రభుత్వం కూలిపోతుందనే భయంతోనే వెనుకడుగు వేస్తున్నారన్నారు. ఆరోపణలు ఎదుర్కొంటున్న మంత్రులు ఇదే విధంగా వ్యవహరిస్తే ఇక జైళ్లోనే మాజీ మంత్రివర్గ ఉపసంఘం ఏర్పాటు చేసుకోవాల్సి ఉంటుందని ఎద్దేవా చేశారు.

Published On March 15, 2012