బేగంపేట ఎయిర్ పోర్టులో తృటిలో తప్పిన ప్రమాదం

హైదరాబాద్: నగరంలో గురువారం పెను ప్రమాదం తప్పింది. హైదరాబాదులోని బేగంపేట విమానాశ్రయంలో అంతర్జాతీయ విమాన యాన ప్రదర్శన జరుగుతోంది. ఈ ప్రదర్శన సందర్భంగా అగ్ని ప్రమాదం జరిగింది. అయితే సిబ్బంది వెంటనే అప్రమత్తం కావడంతో పెను ప్రమాదం తృటిలో తప్పింది. గురువారం మధ్యాహ్నం ప్రదర్శన జరుగుతుండగా అక్కడ ఉన్న పెట్రోలు బంక్ పక్కనే ఒక్కసారిగా మంటలు చెలరేగాయి. ఆ సమయంలో డిజిపి దినేష్ రెడ్డి తన కుటుంబ సభ్యులతో అక్కడే ఉన్నారు. ముఖ్యమంత్రి కిరణ్ కుమార్ రెడ్డి అక్కడి నుంచే మహబూబ్‌నగర్ ఎన్నికల ప్రచారానికి వెళ్లనున్నారు. తెలుగుదేశం పార్టీ అధినేత నారా చంద్రబాబు నాయుడు కూడా వరంగల్ జిల్లాలోని స్టేషన్ ఘనపూర్‌లో ఎన్నికల ప్రచారం ముగించుకొని హెలికాప్టర్‌లో బేగంపేటకు రావాల్సి ఉంది.

విమానాశ్రయ సిబ్బంది, అగ్నిమాపక సిబ్బంది సకాలంలో స్పందించి మంటల్ని ఆర్పేయటంతో పెను ప్రమాదం తప్పింది. ఎవరో సిగరేట్ తాగి ఆర్పకుండానే అక్కడ విసిరేయడం వల్ల ఈ ప్రమాదం జరిగినట్లుగా భావిస్తున్నారు. కాగా శుక్రవారం నుండి విమానాశ్రయ పరిసరాల్లో ధూమపానాన్ని పూర్తిగా నిషేధించారు.

English summary

Fire Accident occurred in Begumpet Airport on thursday.