భాను కిరణ్ రాజస్థాన్‌లో తల దాచుకున్నాడా?

హైదరాబాద్: మద్దెలచెర్వు సూరి హత్య కేసులో నిందితుడు భాను కిరణ్ రాజస్థాన్‌లో తల దాచుకున్నాడని సిఐడి పోలీసులకు సమాచారం అందినట్లు ఓ తెలుగు న్యూస్ చానెల్ వార్తాకథనం సారాంశం. భాను కిరణ్ రాజస్థాన్‌లోని ఓ మారు మూల గ్రామంలో తల దాచుకున్నట్లు సమాచారం అందుకున్న పోలీసులు అక్కడికి బయలుదేరి వెళ్లినట్లు ఆ చానెల్ తెలిపింది. మద్దెలచెర్వు సూరి హత్య జరిగినప్పటి నుంచి భాను కిరణ్ పరారీలో ఉన్నాడు. అది జరిగి ఏడాది దాటింది. అయినా భాను కిరణ్ ఆచూకీ లభించడం లేదు.

భాను కిరణ్ ఆచూకీపై ఎప్పటికప్పుడు ఊహాగానాలు ప్రచారమవుతూనే ఉన్నాయి. తిరుపతి పరిసర ప్రాంతాల్లో ఉన్నట్లు, తూర్పు గోదావరి జిల్లాలో ఉన్నట్లు కూడా ప్రచారాలు సాగాయి. సూరిని హత్య చేసిన తర్వాత ఢిల్లీకి పారిపోయి ఓ చిన్నపాటి లాడ్జిలో ఉన్న భాను అక్కడి నుంచి పారిపోయి వివిధ ప్రాంతాల్లో తిరుగుతున్నట్లు చెబుతున్నారు. భాను కిరణ్ తన కుటుంబ సభ్యులకు ఫోన్లు చేస్తున్నట్లు పోలీసులు గుర్తించారని చెబుతున్నారు. అలాగే, రాష్ట్రంలోని ఇద్దరు మిత్రులతో కూడా మాట్లాడుతున్నట్లు తెలుస్తోందంటూ ఆ టీవీ చానెల్ తెలిపింది. ఆ సంభాషణల ఆధారంగానే భాను కిరణ్‌ను పట్టుకోవడానికి పోలీసులు రాజస్థాన్ బయలుదేరినట్లు ఆ టీవీ చానెల్ తెలిపింది.

English summary

According to a news channel- Bhanu Kiran, accused in Maddelachervu Suri murder case, is hiding in Rajasthan.