కొవూరు గెలుపుపై జోరుగా బెట్టింగులు, 'తెలంగాణ'పైనా

By Srinivas

Published: Sunday, March 18, 2012, 13:19 [IST]

హైదరాబాద్: తెలంగాణలోని ఆరు నియోజకవర్గాలతో పాటు శ్రీ పొట్టి శ్రీరాములు నెల్లూరు జిల్లాలోని కొవూరుకు జరుగుతున్న ఉప ఎన్నికలపై జోరుగా బెట్టింగులు జరుగుతున్నాయని తెలుస్తోంది. ప్రధానంగా కొవూరు నియోజకవర్గంపై కోట్లాది రూపాయల బెట్టింగు జరుగుతోందని తెలుస్తోంది. కొవూరు నియోజకవర్గంలో అభ్యర్థులపై విశాఖ, విజయవాడ, కరీంనగర్, కడప, చిత్తూరు తదితర పట్టణాల్లో పందెం రాయుళ్లు బెట్టింగులు జరుపుతున్నారని సమాచారం. ఇక్కడ అభ్యర్థుల విజయంతో పాటు రెండు, మూడు స్థానాల పైనా బెట్టింగులు జరుగుతున్నాయి. వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి అభ్యర్థి నల్లపురెడ్డి ప్రసన్న కుమార్ రెడ్డి గెలుపుపై ప్రధానంగా బెట్టింగ్ జరుగుతోందట. టిడిపి అభ్యర్థి సోమిరెడ్డి చంద్రమోహన్ రెడ్డి, కాంగ్రెసు అభ్యర్థి పోలంరెడ్డి స్రీనివాస్ రెడ్డి గెలుపు పైనా బెట్టింగులు జరుగుతున్నాయి.

తెలంగాణ ప్రాంతంలో జరుగుతున్న ఆరు నియోజకవర్గాల పైనా బెట్టింగులు జరుగుతున్నాయి. ప్రధానంగా మహబూబ్ నగర్ నియోజకవర్గంలో బిజెపి, టిఆర్ఎస్‌ల గెలుపుపై, నాగర్ కర్నూలులో స్వతంత్ర అభ్యర్థి నాగం జనార్ధన్ రెడ్డి గెలుపుపై, స్టేషన్ ఘనపూర్‌లో కడియం శ్రీహరి గెలుపుపై బెట్టింగులు జరుగుతున్నాయని సమాచారం. కామారెడ్డి, అదిలాబాద్, కొల్లాపూర్‌ల పైనా అదే పరిస్థితి. ఇక్కడ టిఅర్ఎస్ అభ్యర్థుల గెలుపుపై, రెండో స్థానంపై బెట్టింగులు జరుగుతున్నాయని తెలుస్తోంది.

Published On March 18, 2012