మళ్లీ ప్రమాణం చేసిన అఖిలేష్ కేబినెట్ మంత్రి అజమ్

By Srinivas

Published: Sunday, March 18, 2012, 16:07 [IST]

లక్నో: సమాజ్‌వాది పార్టీ నేత మహమ్మద్ అజం ఖాన్ ఆదివారం మళ్లీ మంత్రిగా ప్రమాణ స్వీకారం చేశారు. ఉత్తర ప్రదేశ్ మంత్రిగా ఆయన ఇటీవలె ప్రమాణ స్వీకారం చేశారు. అయితే ఆయన రాజ్యాంగ నిబంధనల ప్రకారం ప్రతిజ్ఞ చేయకపోవడంతో మళ్లీ ప్రమాణం చేయాల్సి వచ్చింది. అజమ్ రాజ్యాంగంలోని మూడువ షెడ్యూల్‌లో సూచించిన విధంగా ప్రమాణం చేయలేదని, అందువల్ల ఆయన మంత్రిగా వ్యవహరించకుండా ఉత్తర్వులు జారీ చేయాలని స్థానిక న్యాయవాది ఒకరు అలహాబాద్ హైకోర్టులో పిటిషన్ దాఖలు చేశారు. ఆయన పిటిషన్‌ను కోర్టు స్వీకరించింది. ఈ పిటిషన్ పైన 20వ తేదిన విచారణ జరిపేందుకు నిర్ణయించింది. దీంతో ఖాన్ ప్రమాణ స్వీకారానికి సంబంధించిన వీడియోలు పరిశీలించిన వీడియోలు పరిశీలించిన ప్రభుత్వ వర్గాలు ఆయనతో తిరిగి ప్రమాణ స్వీకారం చేయించాయి.

ఉత్తర ప్రదేశ్ ముఖ్యమంత్రి ప్రమాణ స్వీకారం చేసిన ఎస్పీ చీఫ్ ములాయం సింగ్ యాదవ్ తనయుడు అఖిలేష్‌ సింగ్ యాదవ్‌తో పాటే నాలుగు రోజుల క్రితం అజమ్ ఖాన్ ప్రమాణ స్వీకారం చేసిన విషయం తెలిసిందే. కాగా అజమ్ ఖాన్ రాంపూర్ నుండి ఇటీవల జరిగిన ఎన్నికల్లో పోటీ చేసి గెలుపొందిన విషయం తెలిసిందే. అజమ్‌ను ఓడించేందుకు జయప్రద శక్తి వంచన లేకుండా ప్రయత్నాలు చేసింది. చిరకాల ప్రత్యర్థి అయిన అజమ్ ఓటమే లక్ష్యంగా అమె ప్రచారం నిర్వహించింది. కానీ బిఎస్పీ వ్యతిరేకత, అఖిలేష్ యాదవ్ ఇమేజ్ కారణంగా ఘన విజయం సాధించాడు.

Published On March 18, 2012