నా వద్ద అద్భుత దీపం లేదు: కాంగ్రెస్ ఓటమిపై సిఎం

హైదరాబాద్: రాష్ట్రంలో జరిగిన ఉప ఎన్నికల్లోని ఏడు నియోజకవర్గాల్లో తాము ఆశించిన ఫలితాలు రాలేదని ముఖ్యమంత్రి కిరణ్ కుమార్ రెడ్డి బుధవారం చెప్పారు. ఉప ఎన్నికల ఫలితాలపై ముఖ్యమంత్రి మీడియా సమావేశంలో మాట్లాడారు. రాజకీయంగా సమర్థవంతంగా పని చేయలేక పోయామని ఆయన అన్నారు. మహబూబ్ నగర్ అభ్యర్థి ఎంపికలో తప్పు చేశామని అన్నారు. కాంగ్రెసు ఓటమికి అందరిదీ బాధ్యతేనని, ముఖ్యమంత్రిగా తనది కూడా బాధ్యత అన్నారు. ఎస్పీఎస్ నెల్లూరు జిల్లా కొవూరులో మొదటి నుండి కాంగ్రెసు పార్టీ పైన వ్యతిరేకత ఉందన్నారు. ఫలితాలపై ఎలాంటి ఆందోళన అవసరం లేదన్నారు. మా పని తీరు మెరుగుపర్చుకుంటామని చెప్పారు.

తెలంగాణపై నిర్ణయం తీసుకోవడంలో ఆలస్యమవుతోందన్నారు. తెలంగాణ అంశం కేంద్రం చేతిలో ఉందని చెప్పారు. ఓటమికి విద్యుత్ కొరత కూడా ఓ కారణమని ఆయన అభిప్రాయపడ్డారు. అసెంబ్లీలో తెలంగాణపై తీర్మానం అవసరం లేదని ఆయన అన్నారు. ఏడు నియోజకవర్గాలలోని రెండు చోట్ల గట్టి పోటీ ఇచ్చామన్నారు. కాంగ్రెసు పథకాలను ప్రజల్లోకి తీసుకు వెళ్లలేక పోయామన్నారు. అద్భుతాల సృష్టికి తన వద్ద ఎలాంటి అద్భుత దీపం లేదన్నారు.

English summary

CM Kiran Kumar Reddy said that he also responsible for defeat in bypoll.