ఓటమికి ఎవరూ బాధ్యులు కారు: ముఖ్యమంత్రి మాట

విశాఖపట్నం: ఉప ఎన్నికల్లో కాంగ్రెస్ అభ్యర్థుల ఓటమికి బాధ్యత అటు పార్టీదీ కాదు, ఇటు ప్రభుత్వానిదీ కాదని ముఖ్యమంత్రి కిరణ్ కుమార్ రెడ్డి అన్నారు. ఓటమికి కారణాలేమిటో పార్టీ వేదికపై చర్చిస్తామని చెప్పారు. విశాఖపట్నంలో ఆయన మీడియా ప్రతినిధులతో మాట్లాడారు. ఉప ఎన్నికల్లో కాంగ్రెస్ ఓటమికి కారణం ఏమిటని ప్రశ్నించగా, ముఖ్యమంత్రి కొంత ఆగ్రహంతో స్పందించారు.

మీడియా వారికి ఎప్పుడూ ఏదో ఒక చర్చ ఉండాలని, వారు కాసేపు కూడా ఖాళీగా ఉండలేరని ముఖ్యమంత్రి అన్నారు. అలా అంటూనే.. ఓటమికి కారణాలేమిటో పార్టీ వేదికపై తాము చర్చిస్తామని కిరణ్ చెప్పారు. కేసీఆర్‌కి మొదటిసారి ఎన్నికల్లో ఎంత మెజారిటీ వచ్చిందో, రాజీనామా చేసి తిరిగి పోటీచేస్తే ఎంత మెజారిటీ వచ్చిందో అందరికీ తెలిసిందేనన్నారు. రాజకీయాల్లో గెలుపు, ఓటములు సహజమని వ్యాఖ్యానించారు.

English summary

CM Kiran kumar Reddy said that no body is responsible for Congress defeat.