జెసి కోసం పదవి త్యాగానికి సిద్ధమన్న డిఎల్, సారయ్య!

By Srinivas

Published: Wednesday, March 28, 2012, 9:10 [IST]

హైదరాబాద్: మాజీ మంత్రి, అనంతపురం జిల్లా సీనియర్ కాంగ్రెసు పార్టీ శాసనసభ్యుడు జెసి దివాకర్ రెడ్డి కోసం పదవులు త్యాగం చేసేందుకు తాము సిద్ధంగా ఉన్నామని మంత్రులు డిఎల్ రవీంద్రా రెడ్డి, బస్వరాజు సారయ్యలు మంగళవారం అన్నారు. బస్వరాజు, డిఎల్ అసెంబ్లీ లాబీల్లో మాట్లాడుతుండగా పంచాయతీ రాజ్ శాఖ మంత్రి జానా రెడ్డితో కలిసి జెసి దివాకర్ రెడ్డి అటు వచ్చారు. జెసిని చూసిన డిఎల్ ఆయనతో.. నీకు వందేళ్లు.. నీ కోసం మంత్రి పదవిని నేను త్యాగం చేస్తానంటే సారయ్య కూడా రాజీనామా చేస్తానని అంటున్నారని, అయితే తెలంగాణ ప్రాంతానికి చెందిన, వెనుకబడిన వర్గానికి చెందిన సారయ్యను రాజీనామా వద్దని తాను చెబుతున్నానని చెప్పారు. అందుకు జెసి చిరునవ్వు నవ్వారు.

కాగా కాంగ్రెస్ పార్టీలో ఇటీవల ప్రజాస్వామ్యం ఎక్కువైపోయిందని మంత్రి డిఎల్ రవీంద్రారెడ్డి అన్నారు. దివంగత ముఖ్యమంత్రి వైయస్ రాజశేఖర రెడ్డి హయాంలో ఉన్నప్పుడు పార్టీ ప్రశాంతంగా ఉండేదని అన్నారు. ఇప్పుడు ఆ పరిస్థితి లేదని ఆయన ఆవేదన వ్యక్తం చేశారు. డిఎల్ ఇటీవల ముఖ్యమంత్రిపై తీవ్రస్థాయిలో ధ్వజమెత్తుతున్న విషయం తెలిసిందే.

Published On March 28, 2012