అన్నీ విని అంతా భేషన్న పరిశీలకుడు కృష్ణమూర్తి

By Pratap

Published: Wednesday, March 28, 2012, 16:46 [IST]

హైదరాబాద్: రాష్ట్రంలోని కాంగ్రెసు నాయకుల వాదనలన్నీ అంతా భేషుగ్గానే ఉందని ఎఐసిసి పరిశీలకుడు కృష్ణమూర్తి అన్నారు. రాష్ట్ర కాంగ్రెసు వ్యవహారాల ఇంచార్జీ గులాం నబీ ఆజాద్‌కు సహాయకుడిగా వ్యవహరిస్తున్న కృష్ణమూర్తి హైదరాబాదు వచ్చి బుధవారంనాడు కాంగ్రెసు నాయకులు, ప్రజాప్రతినిధుల వాదనలు విన్నారు. ప్రభుత్వం, పార్టీ సక్రమంగా పనిచేస్తున్నాయని ఆయన కితాబు ఇచ్చారు. ముఖ్యమంత్రి మార్పుపై, పార్టీ నాయకత్వ మార్పుపై బహిరంగ ప్రకటనలు చేస్తే సహించబోమని ఆయన హెచ్చరించారు. ముఖ్యమంత్రిని మార్చాలనే డిమాండ్ తన దృష్టికి రాలేదని ఆయన అన్నారు.

రోటీన్ వ్యవహారంలో భాగంగానే తాను హైదరాబాదు వచ్చానని ఆయన చెప్పారు. డిసిసిల ఖాళీలను భర్తీ చేస్తామని, మార్పులు చేర్పులూ చేపడతామని ఆయన చెప్పారు. తెలంగాణపై పార్టీ అధిష్టానం నిర్ణయం తీసుకుంటుందని ఆయన చెప్పారు. పార్టీలో క్రమశిక్షణా రాహిత్యాన్ని సహించబోమని ఆయన చెప్పారు. రాష్ట్ర కాంగ్రెసు పరిస్థితి గందరగోళంగా మారిన స్థితిలో, ముఖ్యమంత్రిపై అసమ్మతి వర్గం ధ్వజమెత్తుతున్న వాతావరణంలో ఆయన రాష్ట్రానికి వచ్చారు.

కాంగ్రెసు నాయకులు, శాసనసభ్యులు, మంత్రుల అభిప్రాయాలను విన్న ఆయన గులాం నబీ ఆజాద్‌కు ఓ నివేదికను సమర్పిస్తారని తెలుస్తోంది. ముఖ్యమంత్రి కిరణ్ కుమార్ రెడ్డితోనూ పిసిసి అధ్యక్షుడు బొత్స సత్యనారాయణతోనూ ఆయన సమావేశమయ్యారు.

Published On March 28, 2012