చిరంజీవి రాజీనామా, నా చేతిలో ఏం లేదని వ్యాఖ్య

By Srinivas

Published: Thursday, March 29, 2012, 13:38 [IST]

హైదరాబాద్: తిరుపతి శాసనసభ్యుడు, కాంగ్రెసు పార్టీ నేత చిరంజీవి గురువారం తన ఎమ్మెల్యే పదవికి రాజీనామా చేశారు. ఇటీవల చిరంజీవి రాజ్యసభకు ఎంపికైన విషయం తెలిసిందే. ఈ నేపథ్యంలో ఆయన తన రాజీనామాను స్పీకర్ నాదెండ్ల మనోహర్‌కు సమర్పించారు. తాను రాజ్యసభకు వెళ్లినప్పటికి తిరుపతి అభివృద్ధిపై ప్రత్యేక దృష్టి సారిస్తానని చిరంజీవి ఈ సందర్భంగా చెప్పారు. కాగా అసెంబ్లీ లాబీల్లో చిరంజీవికి తెలుగుదేశం పార్టీ నేత రేవంత్ రెడ్డి ఎదురు పడ్డారు. ఈ సందర్భంగా వారిద్దరి మధ్య ఆసక్తికర సంభాషణ జరిగింది. చిరును చూసిన రేవంత్.. రాజ్యసభకు వెళ్తున్నారు.. ఏదైనా రాష్ట్రానికి ఉపయోగపడే మంత్రి పదవి తీసుకోండి అని చెప్పారు. అందుకు చిరంజీవి స్పందిస్తూ.. తన చేతుల్లో ఏమీ లేదని వాళ్లు ఇచ్చింది తీసుకోవాలని చిరునవ్వుతో సమాధానం చెప్పారు.

కాగా గత డిసెంబర్ నెలలో కిరణ్ కుమార్ రెడ్డి ప్రభుత్వంపై తెలుగుదేశం పార్టీ అవిశ్వాస తీర్మానం పెట్టిన విషయం తెలిసిందే. ఆ సమయంలో చిరంజీవి ప్రభుత్వాన్ని గట్టెక్కించారు. ఆ సమయంలోనే అధిష్టానం చిరుకు కేంద్రమంత్రి పదవి హామీ ఇచ్చింది. ఇటీవల ఆయనను రాజ్యసభకు ఎంపిక చేసింది. దీంతో ఆయన గురువారం తన ఎమ్మెల్యే పదవికి రాజీనామా చేశారు.

Published On March 29, 2012