ఇన్నాళ్లకు కళ్లు తెరిచారు: హరికృష్ణపై లక్ష్మిపార్వతి

By Pratap

Published: Thursday, March 29, 2012, 19:02 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడి విషయంలో రాజ్యసభ సభ్యుడు నందమూరి హరికృష్ణ ఇన్నాళ్లకు కళ్లు తెరిచారని స్వర్గీయ ఎన్టీ రామారావు సతీమణి, ఎన్టీఆర్ తెలుగుదేశం పార్టీ అధ్యక్షురాలు లక్ష్మిపార్వతి వ్యాఖ్యానించారు. ఎన్టీఆర్ స్థాపించిన తెలుగుదేశం పార్టీ చంద్రబాబు చేతిలోకి వచ్చిన తర్వాత పిచ్చోడి చేతిలో రాయిగా మారిందని ఆమె గురువారం మీడియాతో అన్నారు. చంద్రబాబు పదవులు అమ్ముకున్నారని ఆమె ఆరోపించారు.

చంద్రబాబు విషయంలో తాను ఎప్పటి నుంచో మొత్తుకుంటున్నానని, ఇన్నాళ్లకు హరికృష్ణ కళ్లు తెరిచారని ఆమె అన్నారు. కుట్రపూరిత రాజకీయాలకు తెర లేపింది చంద్రబాబు నాయుడేనని ఆమె అన్నారు. ఆ రోజు గట్టిగా నిలబడి ఉంటే ఇప్పుడు ఈ పరిస్థితి వచ్చి ఉండేది కాదని ఆమె హరికృష్ణ వ్యాఖ్యలను ఉద్దేశించి అన్నారు. అధికారాన్ని చంద్రబాబు సొంత ప్రయోజనాలకు వాడుకున్నారని, పార్టీని భ్రష్టు పట్టించారని ఆమె అన్నారు. ఎన్టీఆర్‌ను, నందమూరి కుటుంబాన్ని చంద్రబాబు ఎందుకూ పనికి రాకుండా చేశారని ఆమె అన్నారు.

Published On March 29, 2012