తెలంగాణపై తేల్చని చంద్రబాబు, బాధపడ్డారన్న ఎర్రబెల్లి

By Srinivas

Published: Friday, March 30, 2012, 13:42 [IST]

Chandrababu Naidu - Errabelli Dayakar Rao

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు తెలంగాణ అంశంపై పార్టీ నిర్ణయాన్ని ఇంకా తేల్చలేదు. తెలంగాణ ప్రాంత పార్టీ నేతలతో చంద్రబాబు శుక్రవారం భేటీ అయి ఈ అంశంపై చర్చించారు. చంద్రబాబుతో భేటీ అనంతరం ఆ పార్టీ సీనియర్ నేత ఎర్రబెల్లి దయాకర రావు మీడియాతో మాట్లాడారు. తెలంగాణ కోసం జరుగుతున్న ఆత్మహత్యలపై చంద్రబాబు చాలా బాధపడ్డారని ఆయన చెప్పారు. ఈ ప్రాంత ప్రజల మనోభావాలు ఆయన అర్థం చేసుకున్నారని చెప్పారు. తెలంగాణ కోసమే ఆత్మహత్యలు జరుగుతున్నాయని తాము బాబు దృష్టికి తీసుకు వెళ్లామన్నారు. ఆయన దిగ్భ్రాంతి వ్యక్తం చేశారన్నారు. తెలంగాణపై ఏవిధంగా నిర్ణయం తీసుకుంటే అనుకూలంగా ఉంటుందో భేటీలో చర్చించినట్లు చెప్పారు. కేంద్రానికి మరోసారి లేఖ రాసే అంశంపై కూడా ఆయనతో చర్చించామన్నారు. బాబు ఈ విషయంపై సానుకూలంగా స్పందించారన్నారు. తెలంగాణలో పార్టీని బతికించుకోవడంపై పార్టీలో చర్చించామని, పార్టీ భవిష్యత్తు దృష్ట్యా బాబు సానుకూల నిర్ణయం తీసుకుంటారని తాము భావిస్తున్నట్లు చెప్పారు. నిర్ణయం బాబుకే వదిలేశామన్నారు.

పార్లమెంటులో బిల్లు పెట్టే విధంగా కేంద్రంపై ఒత్తిడి తీసుకు వస్తామని చెప్పారు. తెలంగాణ రాష్ట్ర సమితి కాంగ్రెస్ మిగిలిన పార్టీలను వదిలి కేవలం టిడిపినే టార్గెట్ చేస్తుందని ఎర్రబెల్లి అన్నారు. ప్రణబ్ ముఖర్జీకీ మేం తెలంగాణకు అనుకూలంగా ఇప్పటికే లేఖ ఇచ్చామన్నారు. మరోసారి ఇచ్చే అంశంపై చర్చిస్తున్నామన్నారు. రెండుమూడు రోజుల్లో మరోసారి భేటీ అయి నిర్ణయిస్తామని చెప్పారు. తెలంగాణ కోసం ప్రతిపక్ష పార్టీగా ఏవిధంగా కేంద్రంపై ఒత్తిడి తీసుకు రావాలనే అంశాన్ని పరిశీలిస్తామన్నారు. పార్టీలో అసంతృప్తి మామూలేనని ఆయన అన్నారు.

Published On March 30, 2012