తెలంగాణ కోసం మరో విద్యార్థి ఆత్మబలిదానం

By Pratap

Published: Friday, March 30, 2012, 9:27 [IST]

మహబూబ్‌నగర్: తెలంగాణ కోసం మరో యువకుడు ఆత్మహత్య చేసుకున్న విషాద సంఘటన చోటు చేసుకుంది. మహబూబ్‌నగర్‌లో ఓ యువకుడు ఉరేసుకుని ఆత్మహత్య చేసుకున్నాడు. స్థానిక సంజయ్‌నగర్‌కు చెందిన అనిల్‌కుమార్ రెడ్డి (19) బుధవారం టీచర్స్ కాలనీలోని స్నేహితుల గదికి వెళ్లాడు. గురువారం ఉదయం స్నేహితులు పరీక్ష రాయడానికి వెళ్లిపోయాక ఫ్యాన్‌కు ఉరేసుకున్నాడు. పరీక్ష పూర్తయ్యాక స్నేహితులు గదికి చేరుకొని, అది చూసి దిగ్భ్రాంతి చెందారు. వెంటనే జిల్లా ఆస్పత్రికి తీసుకెళ్లగా, అప్పటికే చనిపోయినట్లు వైద్యులు నిర్ధారించారు. వెంటనే మృతుడి తల్లిదండ్రులకు సమాచారం అందించారు. గదిలో ఉన్న ఆత్మహత్య లేఖను పోలీసులు స్వాధీనం చేసుకుని దర్యాప్తు చేస్తున్నారు.

తెలంగాణలోని ఎమ్మెల్యేలు, ఎంపీలు, మంత్రులంతా కలిసి ఆమరణ దీక్ష చేస్తే తెలంగాణ ఎందుకు రాదో తెలుస్తుందని, తెలంగాణ వచ్చే వరకు పోరాడాలని అతను సూసైడ్ నోట్‌లో రాశాడు. అనిల్‌కుమార్ తండ్రి నారాయణరెడ్డి బస్టాండ్‌లో సైకిల్ టాక్సీ నడుపుతున్నాడు. బుధవారం ఇంటి నుంచి వెళ్లిన అనిల్ రాత్రి ఇంటికి రాలేదని, ఫోన్ చేసినా స్పందించలేదని నారాయణరెడ్డి చెప్పాడు.

Published On March 30, 2012