జగన్ ఆస్తులను చూసి సోనియా ఆశ్చర్యం!: శైలజానాథ్

By Srinivas

Published: Sunday, April 1, 2012, 15:35 [IST]

అనంతపురం: అతి తక్కువ కాలంలో వైయస్సార్ కాంగ్రెస్ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి సంపాదించిన ఆస్తులు చూసి ఏఐసిసి అధ్యక్షురాలు సోనియా గాంధీ సహా కాంగ్రెసు పార్టీ నేతలు అందరూ భయపడుతున్నారని, ఆశ్చర్యపడుతున్నారని మంత్రి శైలజానాథ్ ఆదివారం అన్నారు. జగన్‌కు కోర్టులు ఏ శిక్ష విధించినా తూచ తప్పకుండా ప్రభుత్వం అమలు చేస్తుందని ఆయన అన్నారు. మంత్రివర్గ నిర్ణయాలు అడ్డు పెట్టుకొని తెరచాటు వ్యవహారాలకు పాల్పడిన భూములను రాష్ట్ర ప్రభుత్వం వెనక్కి తీసుకుంటుందని అన్నారు. భూములు ఇవ్వడం ద్వారా యువతకు ఉద్యోగాలు దొరుకుతాయని మంత్రులు ఆమోదించారని తెరవెనుక జరిగే వాటికి మంత్రులు ఎలా బాధ్యత వహిస్తారన్నారు. కేసులో జగన్‌ను మొదటి నిందితుడిగా పేర్కొనడం వెనుక కాంగ్రెసు పార్టీ హస్తముందన్న వైయస్సార్ కాంగ్రెస్ వ్యాఖ్యలను ఆయన ఖండించారు.

టిడిపి అధినేత పరిటాల రవి హత్య కేసులో జగన్‌కు క్లీన్ చిట్ ఇస్తే హర్షించిన వారు ఇప్పుడు అదే సంస్థను నిందించడం తగదన్నారు. చంద్రబాబు అతిపెద్ద అవినీతిపరుడు అని ధ్వజమెత్తారు. బాబు పలు కేసులలో కోర్టుల నుండి స్టే తెచ్చుకొని కాలం గడిపేస్తున్నారని విమర్శించారు. ముఖ్యమంత్రి కిరణ్ కుమార్ రెడ్డిని విమర్శించే నైతిక హక్కు చంద్రబాబుకు లేదన్నారు. రాజ్యసభ సీట్లు అమ్ముకున్న ఘనత బాబుదే అన్నారు.

Published On April 1, 2012