కాళేశ్వర్ బాబా ఆభరణాలు మాయం, ఆస్తి ఖాళీ

By Pratap

Published: Monday, April 9, 2012, 11:53 [IST]

కడప: ఇటీవల మృతి చెందిన కాళేశ్వర్ బాబా ఆశ్రమంలో కోట్లాది రూపాయల విలువచేసే ఆభరణాలు మాయమైనట్లు ఆంధ్రజ్యోతి దినపత్రిక ఓ వార్తాకథనాన్ని ప్రచురించింది. అనంతపురం జిల్లా పెనుకొండలోని ఆయన ఆశ్రమంలో గల బీరువాలు ఖాళీగా దర్శనమివ్వడంపై కాళేశ్వర్ తండ్రి సుబ్బరాయుడు తీవ్ర మనస్తాపానికి గురైనట్లు ఆ పత్రిక రాసింది. కడపలోని తమ స్వగృహంలో ఈ విషయాలపై ఆయన తమతో మాట్లాడినట్లు ఆ పత్రిక రాసింది. కాళేశ్వర్ ఆశ్రమంలోని గదులను ఈనెల 5న తెరిచారని, అందులోని బీరువాలను కాళేశ్వర్ భార్య శిల్పతో తెరిపించారని అన్నారు. ఆ బీరువాల్లో ఆభరణాలు మాయం కావడం షాక్‌కు గురిచేసిందని చెప్పారని ఆ పత్రిక రాసింది.

ఆంధ్రజ్యోతి దినపత్రిక వార్తాకథనం ప్రకారం - బాబాను గతనెల 14న ఆస్పత్రిలో చేర్చగానే ఆయన గదులకు తాళం వేశారని, కలెక్టర్‌కు విన్నవించుకోవడంతో ఆర్డీవో ద్వారా 11 మంది సభ్యులు లోనికి వెళ్లి ఈ నెల 5న గదుల తాళం తీసి బీరువాలు తెరచి చూశారన్నారు. బీరువాల్లో బాబా ఆభరణాలు ఏమీ లేవని, కోట్ల రూపాయల ఆభరణాలు కనిపించకుండా పోయాయని చెప్పారు. ఆరు అడుగుల ఆంజనేయస్వామి విగ్రహానికి 5 కేజీల బంగారు కిరీటం, గద, కవచం.. ఇవేవీ లేవని తెలిపారు. షిరిడీ సాయి విగ్రహానికి చెందిన హారం, వెండి ఆభరణాలు కూడా లేవన్నారు. కాళేళ్వర్ చేతికి ఉండాల్సిన ఉంగరాలు, ఆయనకున్న రెండు బంగారం బెల్టులలో ఒక బెల్ట్, బ్రాస్‌లెట్లు కూడా కనిపించడం లేదని వివరించారు.

ఆశ్రమం బయట భారీ బందోబస్తు ఉన్నా ఇలా జరిగిందంటే ఏదో పథకం ఉన్నట్లు కనిపిస్తోందని అనుమానం వ్యక్తం చేశారు. ఇది ఒకరోజులో జరిగింది కాదని, పద్ధతి ప్రకారం జరుగుతూ వచ్చిందని అన్నారు. కాళేశ్వర్ ఆస్తులు ఆశ్రమానికి చెందాలని, ఆశ్రమం ద్వారా సేవలందించి ఆయన సంకల్పం నెరవేర్చాలని చెప్పారు. ప్రభుత్వం ఈ ఆస్తులు కాపాడేందుకు సీబీఐతో విచారణ చేయించాలన్నారు. ఆశ్రమ నిర్వహణకు ప్రతినెలా రూ.10 లక్షలు ఖర్చవుతుందని, ఆస్తులు అన్యాక్రాంతమైతే ఆశ్రమ నిర్వహణ కుంటుపడుతుందని ఆవేదన వెలిబుచ్చారు.

కాళేశ్వర్ ఆశ్రమ గదులను కలెక్టర్ ఆదేశాలతో తెరిచారని, ఈ 11 మంది సభ్యుల్లో నలుగురు విదేశీయులు, ఒక లాయర్, ఒక ఆడిటర్, ఆశ్రమ మేనేజర్ చంద్రమౌళిరెడ్డితో పాటు కాళేశ్వర్ తల్లి సుబ్బమ్మ, అల్లుడు రూపేష్‌కుమార్, భార్య శిల్ప, ఆమె తండ్రి భాస్కర్‌రెడ్డి ఉన్నారని ఆయన చెప్పారు.

తమ కుటుంబసభ్యులు ఆశ్రమంలో ఉండగా కొందరు ఫోన్ చేసి బెదిరిస్తున్నారని సుబ్బరాయుడు ఆందోళన వ్యక్తం చేసినట్లు ఆంధ్రజ్యోతి రాసింది. తన ముగ్గురు కుమార్తెలలో శైలజకు బెదిరింపు ఫోన్‌లు వచ్చాయని, వాటిలో కొన్ని అమెరికా నుంచి వచ్చినట్లు భావిస్తున్నామన్నారు. తనకు బెదిరింపు కాల్స్ వచ్చినట్లు సుబ్బరాయుడు కుమార్తె శైలజ ఫోన్‌లో తెలిపారు. బెదిరింపులు ఏ ఫోన్ నెంబర్ల నుంచి వచ్చాయో కూడా ఆంధ్రజ్యోతి పత్రిక తెలిపింది.

Published On April 9, 2012