మరో భూకంపం: ఈసారి అరేబియా సముద్రంలో

ముంబై: మరో భూకంపం కూడా చోటు చేసుకుంది. రెండో భూకంపం అరేబియా సముద్రంలో చోటు చేసుకుంది. అయితే దీని తీవ్రత తక్కువగా ఉంది. దాని తీవ్రత రెక్టర్ స్కేలుపై 3.4గా నమోదైంది. ముంబైకి 155 కిలోమీటర్ల దూరంలో ఇది కేంద్రీకృతమైనట్లు వాతావరణ పరిశోధన కార్యాలయం అధికారులు చెప్పారు. ఉత్తర ముంబైలో ప్రకంపనలు చోటు చేసుకున్నట్లు సమాచారం. అయితే, వాటిని వాతావరణ పరిశోధన కార్యాలయం అధికారులు ధ్రువీకరించడం లేదు.

ఇండోనేషియాలో బుధవారం భారీ భూకంపం వచ్చిన విషయం తెలిసిందే. ఈ భూకంపం రెక్టర్ స్కేలుపై 8.7గా నమోదైంది. దీంతో 28 దేశాలకు సునామీ హెచ్చరికలు జారీ చేశారు. దాని ప్రభావంతో భారతదేశంలోని పలు ప్రాంతాల్లో ప్రకంపనలు చోటు చేసుకున్నాయి. భారతదేశంలోని గౌహతి, చెన్నై, కోల్‌కత్తా, బెంగళూర్, విజయవాడ, విశాఖపట్నం వంటి పలు ప్రాంతాల్లో భూప్రకంపనలు చోటు చేసుకున్నాయి.

భూప్రకంపనల నేపథ్యంలో భారత ప్రభుత్వం అప్రమత్తమైంది. అండమాన్, నికోబార్ దీవులకు ప్రభుత్వం సునామీ హెచ్చరికలు జారీ చేసింది. ఇండోనేషియాలోనే సుమత్రా తీరంలో భూకంపం చోటు చేసుకుంది. హిందూ మహాసముద్రంలోని అండమాన్ నికోబార్ దీవులకు ఇండియన్ నేషనల్ సెంటర్ ఫర్ ఓసియన్ ఇన్‌ఫర్మేషన్ సర్వీస్ రెడ్ హై - లెవల్ వార్నింగ్ జారీ చేసింది. తమిళనాడులోని పలు ప్రాంతాల్లో కూడా భూప్రకంపనలు చోటు చేసుకున్నాయి. పశ్చిమ బెంగాల్, బీహార్, అస్సాం, మణిపూర్‌ల్లో కూడా ఇండోనేషియా భూకంపం ప్రభావం కనిపించింది.

ఇండోనేషియాలో ప్రాణ, ఆస్తి నష్టాలకు సంబంధించిన సమాచారం ఏదీ ఇప్పటి వరకు అందలేదు. హిందూ మహాసముద్రం మొత్తంగా సునామీ హెచ్చరికల ప్రభావం ఉండవచ్చునని పసిఫిక్ సునామీ వార్నింగ్ సెంటర్ తెలిపింది. సింగపూర్, థాయ్‌లాండ్ వంటి ప్రాంతాల్లో కూడా దాని ప్రభావం కనిపించింది.

English summary

An earthquake measuring 3.4 on the Richter scale was recorded in the Arabia Sea, the Met office here said. "The shock registered at 18.6 degree latitude and 71.3 degree longitude in the Arabian Sea," Met department said.