అలనాటి నటీమణి అచలా సచిదేవ్ కన్నుమూత

న్యూఢిల్లీ: అలనాటి బాలీవుడ్ నటీమణి అచలా సచ్‌దేవ్ (91) కన్ను మూశారు. ప్రస్తుత పాకిస్థాన్‌లోని పెషావర్‌లో 1920లో ఆమె జన్మించింది. తన 18వ ఏట 1938లో 'ఫ్యాషనబుల్ వైఫ్' చిత్రంతో బాలీవుడ్‌లో రంగప్రవేశం చేశారు. అప్పటినుంచి దాదాపు 150కి పైగా సినిమాల్లో ఆమె నటించింది. గత కొన్ని నెలలుగా అనారోగ్యంతో బాధపడుతున్న ఆమె పుణె ఆస్పత్రిలో చికిత్స పొందుతున్నారు. హకీకత్, వక్త్, మేరా నామ్ జోకర్, జూలీ లాంటి చిత్రాల్లో ఆమె నటన ప్రశంసలు అందుకుంది.

హృతిక్ రోషన్ హీరోగా 2002లో విడుదలైన చిత్రం 'న తుమ్ జానో న హమ్'లో ఆమె చిట్టచివరగా నటించారు. ప్రస్తుత తరానికి ఆమె ఎక్కువగా తల్లి లేదా నాయనమ్మ పాత్రలలోనే పరిచయం. 2011 సెప్టెంబర్‌లో వంటగదిలో జారి పడటంతో ఆమె కాలు విరిగింది. తర్వాత మెదడులో రక్తం పలుచోట్ల గడ్డకట్టడంతో పక్షవాతం బారిన పడింది. దృష్టి కూడా పోయింది. కొన్ని రోజుల క్రితం ఆమె ఆరోగ్యం తీవ్రంగా దెబ్బతిని, అప్పటినుంచి వెంటిలేటర్‌పైనే ఉన్నారు. చివరకు సోమవారం తుదిశ్వాస విడిచారు.

అచలా సచ్‌దేవ్ కుమారుడు జ్యోతియోన్ అమెరికాలో ఉంటున్నాడు. బ్లాక్ బస్టర్ వక్త్ సినిమాలో బాల్‌రాజ్ సాహ్ని భార్యగా ఆమె నటన విశేషంగా మన్ననలు పొందింది. ఈ సినిమా 1965లో వచ్చింది. ప్రేమ్ పూజారి, హరే రామ హరే కృష్ణ, అందాజ్ వంటి చిత్రాల్లో కూడా ఆమె నటించారు. దిల్‌వాలే దుల్హనియా లే జాయేంగే చిత్రంలో కాజోల్ నాయనమ్మగా నటించింది. కభీ ఖుషీ కభీ గమ్ చిత్రంలో అమితాబ్ బచ్చన్ తల్లిగా నటించింది.

English summary

Achala Sachdev, who acted as the wife of Balraj Sahni in BR Chopra’s Waqt, passed away earlier today at the Poona Hospital and Research Centre. 88-year-old Achala has been receiving treatment for various illnesses for over six months now. After fracturing her leg recently, Achala Sachdev's health began deteriorating. After suffering from severe respiratory problems, Achala was put on ventilator support.