సర్పంచ్‌ను గెలిపించగలవా?:సిఎంకు శంకరరావు సవాల్

హైదరాబాద్: పీలేరు సర్పంచ్‌ని గెలిపించగలవా అని ముఖ్యమంత్రి కిరణ్ కుమార్ రెడ్డికి మాజీ మంత్రి శంకర రావు సవాల్ విసిరారు. శంకర రావు మంగళవారం మరోసారి కిరణ్‌పై విరుచుకు పడ్డారు. ముఖ్యమంత్రికి తన సొంత నియోజకవర్గం పీలేరులో సర్పంచ్‌ను గెలిపించే సత్తా ఉందా అని ప్రశ్నించారు. ముఖ్యమంత్రి కానీ, సిఎల్పీ నేతలు కానీ తనను సిఎల్పీలో మాట్లాడకుండా అడ్డుకోగలరా అని అన్నారు. సిఎల్పీలో మాట్లాడటం తన హక్కు అన్నారు.

తన ప్రెస్ మీట్‌పై ఎవరూ ఆంక్షలు పెట్టలేరని, ఎవరూ అడ్డుకోలేరని అన్నారు. స్థానిక సంస్థల ఎన్నికలలో పార్టీ గుర్తుతో వెళితే నష్టం జరుగుతుందన్నారు. పార్టీలరహితంగా స్థానిక సంస్థల ఎన్నికలు నిర్వహించాలని ఆయన సూచించారు. నామినేటెడ్ పోస్టులను వెంటనే భర్తీ చేయాలని ఆయన సూచించారు.

కిరణ్‌కు సొంత బలం లేదన్నారు. ఎమ్మెల్యేలు ఎవరు కూడా ఆయనను ఎన్నుకోలేదన్నారు. తన తండ్రి చనిపోయిన సానుభూతితో కిరణ్ కుమార్ రెడ్డి ఓసారి గెలిస్తే, కాంగ్రెసు హవాలో రెండుసార్లు గెలిచారన్నారు. ఆయన తన సొంత ఇమేజ్‌తో గెలవలేదన్నారు. సీక్రెట్ బ్యాలెట్ పెడితే ఎమ్మెల్యేలు, మంత్రులు అందరూ ఆయనను తిరస్కరిస్తారని చెప్పారు.

ముఖ్యమంత్రికి దమ్ముంటే తనను పార్టీ నుండి సస్పెండ్ చేయాలని సవాల్ చేశారు. తనకు ఇరవై వేల నుండి ముప్పై వేల మందితో బహిరంగ సభ పెట్టే సత్తా ఉందన్నారు. కిరణ్‌తో కాంగ్రెసుకు నష్టమే తప్ప ఎలాంటి లాభం లేదన్నారు. కాగా సోమవారం కూడా శంకర రావు ముఖ్యమంత్రిపై తీవ్రమైన ఆరోపణలు చేసిన విషయం తెలిసిందే.

English summary

Former minister Shankar Rao lashes out at chief minister Kiran Kumar Reddy again on Tuesday. He said Congress Party MLAs were not elected Kiran as CM. He said, Kiran won one time with his father sentiment and two times with Congress josh as MLA.