నల్లధనంపై పార్లమెంటులో ప్రణబ్ శ్వేతపత్రం

న్యూఢిల్లీ: నల్లధనంపై కేంద్ర ఆర్థిక మంత్రి ప్రణబ్ ముఖర్జీ సోమవారం పార్లమెంటులో నల్లధనంపై శ్వేతపత్రం ప్రవేశపెట్టారు. విదేశాల్లోని నల్లధనం వివరాలను కూడా అందిస్తూ ఆయన ఆ శ్వేతపత్రాన్ని పార్లమెంటు మందు ఉంచారు. ఆర్థిక బిల్లుపై చర్చ సందర్భంగా ఇచ్చిన హామీ మేరకు ఆయన శ్వేతపత్రం ప్రవేశపెట్టారు. ప్రణబ్ ముఖర్జీ ప్రవేశపెట్టిన శ్వేతపత్రం వంద పేజీలు ఉంది.

తాను సంబంధిత, సాధ్యమైన వివరాలన్ని అందించడానికి ప్రయత్నిస్తానని, ఈ సమావేశాల్లో శ్వేతపత్రం ప్రవేశపెడతామని ప్రణబ్ ముఖర్జీ గత వారం పార్లమెంటులో చెప్పారు. నల్లధనాన్ని అరికట్టేందుకు బహుముఖ వ్యూహం అవసరమని ఆయన శ్వేతపత్రాన్ని ప్రవేశపెడుతూ అన్నారు. రియల్ ఎస్టేట్, బంగారం వ్యాపారులపై దృష్టి పెడతామని ఆయన చెప్పారు. ఈ రెండు రంగాల నుంచే లెక్కకు రాని ధనం ఉందని ఆయన చెప్పారు.

కంపెనీలు పన్ను ఎగవేయడానికి ప్రయత్నిస్తున్నాయని చెప్పడానికి వోడాఫోన్ కేసే నిదర్శనమని ఆయన తన శ్వేతపత్రంలో చెప్పారు. ప్రభుత్వం తీసుకుంటున్న చర్యలు సత్ఫలితాలు ఇస్తున్నాయని ఆయన చెప్పారు. నల్లధనం వెలికితీతకు ప్రభుత్వం ఐదెంచెల వ్యూహాన్ని చేపట్టిందని, అది మంచి ఫలితాలు ఇస్తోందని ఆయన అన్నారు.

శ్వేతపత్రంలో నల్లధనానికి సంబంధించిన పూర్తి వివరాలు లేవని తెలుస్తోంది. నల్లధనంపై మూడు సంస్థలు స్వతంత్రంగా అధ్యయనం చేస్తున్నాయని, 18 నెలల కాలంలో అవి నివేదికలు సమర్పించాల్సి ఉందని, జూలై - ఆగస్టుల్లో అవి నివేదికలు సమర్పిస్తాయని ఆయన చెప్పారు.

English summary

Finance minister Pranab Mukherjee on Monday tabled a White Paper on black money in Parliament, providing information on black money parked abroad, as promised to the House during a debate on the Finance Bill last week.