కాంగ్రెస్‌లోకి టిడిపి ఎమ్మెల్యే?, ఆజాద్‌తో చిన్నం భేటీ

By Srinivas

Published: Sunday, June 3, 2012, 16:58 [IST]

చిత్తూరు: తాను ముఖ్యమంత్రి కిరణ్ కుమార్ రెడ్డిని, కేంద్రమంత్రి, రాష్ట్ర కాంగ్రెసు పార్టీ వ్యవహారాల ఇంచార్జ్ గులాం నబీ ఆజాద్‌ను కలిసేందుకు తిరుపతికి రాలేదని తెలుగుదేశం పార్టీ కృష్ణా జిల్లా నూజివీడు శాసనసభ్యుడు చిన్నం రామకోటయ్య ఆదివారం అన్నారు. ఆయన తిరుపతి వచ్చారు. తిరుపతిలోని ఓ హోటల్‌లో గులాం నబీ ఆజాద్, కిరణ్ కుమార్ రెడ్డి, రాజ్యసభ సభ్యుడు చిరంజీవిలను కలిశారు. దీనిపై ఆయనను విలేకరులు ప్రశ్నించగా.. తాను వారిని కలిసేందుకు తిరుపతి రాలేదని, తన పుట్టిన రోజు సందర్భంగా వచ్చానని చెప్పారు.

తాను చిరంజీవిని కలిసినట్లు చెప్పారు. 2014 వరకు తాను తెలుగుదేశం పార్టీలోనే కొనసాగుతానని చెప్పారు. ఇప్పటికిప్పుడు ఏ పార్టీలో చేరేది లేదన్నారు. 2014 వరకు ఏ పార్టీ తనకు బాగా అనిపిస్తే ఆ పార్టీలో చేరతానని చెప్పారు. మరోవైపు చిన్నం రామకోటయ్య మర్యాదపూర్వకంగానే సిఎం కిరణ్ కుమార్ రెడ్డిని, ఆజాద్‌లను కలిశారని మంత్రి పార్థసారథి అన్నారు. అతను కాంగ్రెసు పార్టీలో చేరటం లేదన్నారు.

కాగా చిన్నం రామకోటయ్య వైయస్సార్ కాంగ్రెసు పార్టీలో చేరతారనే ఊహాగానాలు ఇటీవల జోరుగా జరిగిన విషయం తెలిసిందే. అయితే ఆయన జగన్ పార్టీలో కాకుండా కాంగ్రెసు తీర్థం పుచ్చుకునే అవకాశాలు కనిపిస్తున్నాయనే వాదనలు వినిపించిన విషయం తెలిసిందే. ఉప ఎన్నికల ప్రచారం నిమిత్తం కేంద్రమంత్రి, రాష్ట్ర పార్టీ వ్యవహారాల ఇంచార్జ్ గులాం నబీ ఆజాద్ ఆదివారం రాష్ట్రానికి రానున్నారు. ఆయన తిరుపతిలో ప్రచారం నిర్వహిస్తారు. చిన్నం రామకోటయ్య గులాం నబీ ఆజాద్ సమక్షంలో కాంగ్రెసు పార్టీలో చేరడానికి ఇప్పటికే తిరుపతికి చేరుకున్నారనే ప్రచారం జరిగింది.

మొదట జగన్ పార్టీలో చేరుదామని అనుకున్నప్పటికీ.. నూజివీడు నియోజకవర్గంలో ఆ పార్టీలో అభ్యర్థి ఇప్పటికే ఉండటంతో కాంగ్రెసు పార్టీలోకి వెళ్లడమే మంచిదని చిన్నం భావించారని అంటున్నారు. దీంతో ఆయన తన దృష్టి కాంగ్రెసు వైపు సారించారంటున్నారు. అయితే ఆయన కాంగ్రెసు తీర్థం పుచ్చుకుంటారనే ప్రచారం జరుగుతున్నప్పటికీ చేరే వరకు ఖచ్చితంగా చెప్పలేని పరిస్థితి నెలకొంది. ఉదయం ఆయన మాట్లాడుతూ.. 2014లో తనకు నచ్చిన పార్టీ నుండి పోటీ చేస్తానని చిన్నం రామకోటయ్య చెప్పారు.

నియోజకవర్గంలో పోటీ నడుస్తోందని, 2014లో తనకు టిక్కెట్ ఇస్తానని పార్టీ అధ్యక్షుడు నారా చంద్రబాబు నాయుడు హామీ ఇచ్చారని, కానీ క్యాడర్ తనకు అనుకూలంగా ఉంటుందనే నమ్మకం తనకు లేదని ఆయన అన్నారు. తాను ఇప్పుడు పార్టీ మారితే లాభం లేదని, తనకు అన్ని పార్టీలు సమానమే అన్నారు. అన్ని పార్టీలతో తనకు మంచి సంబంధముందని ఆయన చెప్పారు. తన ఆశయాలు ఏ పార్టీ ద్వారా నెరవేరుతాయని భావిస్తానో అందులో చేరతానని అన్నారు.

గులాం నబీ ఆజాద్ సమక్షంలో కాంగ్రెసు పార్టీలో చేరనున్నారని ప్రచారం జరుగుతోందని ప్రశ్నించగా.. తనకు ఆజాద్ వచ్చే విషయమే తెలియదని, తాను ఎమ్మెల్యేగా ఉన్నన్ని రోజులు తెలుగుదేశం పార్టీ నేతగానే ఉంటానని స్పష్టం చేశారు. శనివారం చిన్నం రామకోటయ్య బాబుతో భేటీ అయిన తర్వాత టిడిపిలో ఉంటానని చెప్పారు. కానీ ఆ తర్వాత ఆయన తన అసంతృప్తిని బయట పెట్టడం విశేషం.

Published On June 3, 2012