తమిళనాడు రాజధాని చెన్నైలో క్రికెటర్ ఆత్మహత్య

By Pratap

Published: Tuesday, June 12, 2012, 15:45 [IST]

చెన్నై: తమిళనాడు రాజధాని చెన్నైకి చెందిన 20 ఏళ్ల యువ క్రికెటర్ పికె ధర్మ ఆత్మహత్య చేసుకున్నాడు. కోడంబాకంలోని ట్రస్టుపురంలో గల తన నివాసంలో అతను ఆదివారం ఆత్మహత్య చేసుకున్నాడు. తన గదిలో ఉరేసుకుని అతను ఆత్మహత్య చేసుకున్నట్లు పోలీసులు చెబుతున్నారు. ధర్మ క్రికెట్ క్రీడలో ఆల్ రౌండర్. అతనికి మంచి భవిష్యత్తు ఉండిందని అంటున్నారు.

ధర్మ ఆత్మహత్యకు గల కారణాలు తెలియడం లేదు. అతని హఠాన్మరణం అందరినీ దిగ్బ్ఱాంతికి గురి చేసింది. మరణానికి ఒక రోజు ముందు ధర్మ విజయ్ సిసిపై చిదంబరం స్టేడియంలో తాను ప్రాతినిధ్యం వహిస్తున్న గ్లోబ్ ట్రోటర్స్ తరఫున మ్యాచ్ ఆడాడు.

ధర్మ సిటి కళాశాలలో బిఇ మెకానికల్ ఇంజనీరింగ్ చదువుతున్నాడు. శనివారంనాడు మూడు రోజుల తమిళనాడు క్రికెటర్స్ అసోసియేషన్ ఫస్ట్ డివిజన్ ఫైనల్ క్రికెట్ మ్యాచ్ ఆడినప్పుడు అతను బాగానే ఉన్నాడని చెబుతున్నారు. ధర్మ 2011లో తన కెరీర్‌ను ప్రారంభించాడు. పి. బాలాజీ గాయపడడంతో పరిమిత ఓవర్ల మ్యాచులో కూడా అతను అడుగు పెట్టాడు.

తమిళనాడు క్రికెట్ అసోసియేషన్ (టిఎన్‌సిఎ) క్లబ్ కార్యదర్శి కాశీ విశ్వనాథన్ ధర్మ మృతికి సంతాపం ప్రకటించారు. ధర్మ మృతితో తమిళనాడు క్రికెటర్లలో తీవ్ర విషాదం నెలకొంది.

Published On June 12, 2012