దావూద్ ఇబ్రహీంతో బాలీవుడ్ నటి లైలాఖాన్‌కు లింక్స్

By Srinivas

Published: Monday, June 25, 2012, 15:19 [IST]

న్యూఢిల్లీ/ముంబయి: బాలీవుడ్ నటి లైలాఖాన్‌పై సంచలన వార్తలు వస్తున్నాయి. లైలాఖాన్‌కు అండర్ వరల్డ్ డాన్, మోస్ట్ వాంటెండ్ టెర్రరిస్ట్ దావూద్ ఇబ్రహీంతో సంబంధాలు ఉన్నట్లుగా జోరుగా వార్తలు వస్తున్నాయి. దావూద్‌తో ఆమెకు సంబంధాలు ఉన్నట్లు అధికారుల వద్ద పూర్తి సమాచారం ఉన్నట్లుగా తెలుస్తోంది. వివరాల ప్రకారం.. లైలాఖాన్ ప్రస్తుతం దుబాయ్‌లో.. కమల్ యద్వానీ తనయుడు సోనూ వుఫి ఖాన్‌తో ఉన్నారు.

ఇంటెలిజన్స్ నివేదికల ప్రకారం కమల్ యద్వానీకి దావూద్‌తో మంచి సంబంధాలు ఉన్నాయి. దావూద్ సన్నిహితుడు మరియు అతని కుటుంబ సభ్యులు... లైలాఖాన్‌, ఆమె కుటుంబ సభ్యులు దేశం విడిచి వెళ్లేందుకు ఫేక్ పాస్‌పోర్టులు తీసుకునేందుకు సహాయపడ్డారని డిఐజి గరీబ్ దాస్ చెప్పారు. ఈ విషయం తమ ఇంటరాగేషన్‌లో ఉన్న పర్వేజ్ తక్ వెల్లడించారని ఆయన చెప్పారు.

పర్వేజ్ తక్‌ను జమ్మూ పోలీసులు అరెస్టు చేశారు. ఇతను స్థానికంగా కాంట్రాక్టర్‌గా ఉన్నాడు. ఇతనికి లైలాఖాన్ కేసుతో సంబంధం ఉంది. జమ్మూ కాశ్మీర్ పోలీసులు లైలాఖాన్‌కు సంబంధించిన ఎస్‌యువిని సీజ్ చేశారు. ఈమె తన కుటుంబ సభ్యులతో సహా గత మే 29 నుండి కనిపించడం లేదు. మహారాష్ట్ర యాంటీ టెర్రరిస్ట్ స్క్వాడ్ లైలాఖాన్, ఆమె కుటుంబ సభ్యుల కోసం వెతుకుతోంది.

అయితే ఈమెను పోలీసులు ఈ నెల 22న అదుపులోకి తీసుకున్నట్లుగా వార్తలు వస్తున్నాయి. జూన్ 22 ఇందిరాగాంధీ ఇంటర్నేషనల్ ఎయిర్ పోర్టు వద్ద ఆమెను పోలీసులు అదుపులోకి తీసుకున్నట్లుగా సమాచారం. అయితే అధికారులు ఈ విషయాన్ని ధృవీకరించలేదు. ఢిల్లీ హైకోర్టు పేలుళ్లతో లైలాఖాన్‌కు లింకులు ఉన్నట్లుగా వార్తలు వచ్చిన విషయం తెలిసిందే. ప్రస్తుతం లైలాఖాన్ రెండు మూడు చిత్రాలలో నటిస్తోంది. ఈ సినిమాలు విడుదల కాలేదు.

కాగా ముంబయి పేలుళ్ల కేసులో కీలక నిందితులను పోలీసులు అరెస్టు చేశారు. పేలుళ్ల ఘటన సూత్రధారుల్లో ఒకడైన అబుహజమ్ అలియాస్ సయీద్ జుబియూద్దీన్‌ను ఢిల్లీ ఇందిరాగాంధీ ఇంటర్నేషనల్ విమానాశ్రయంలో పోలీసులు అదుపులోకీ తీసుకున్నారు. ఇండియన్ ముజహిద్దీన్ టెర్రరిస్టు సంస్థకు చెందిన ఇతను పాక్‌కు వెళ్లి మంబయి పేలుళ్ల కోసం పలువురికి శిక్షణ ఇచ్చినట్లు ఆరోపణలు ఉన్నాయి.

Published On June 25, 2012