దినేష్ రెడ్డితో ఫైట్: ఉమేష్‌ కుమార్‌పై క్షుద్రపూజల కేసు

By Pratap

Updated: Wednesday, July 25, 2012, 19:55 [IST]

హైదరాబాద్: డిజిపి పదవి కోసం దినేష్ రెడ్డిపై సమరం సాగించిన ఐపియస్ అధికారి ఉమేష్ కుమార్ మరో వివాదంలో చిక్కుకున్నారు. దినేష్ రెడ్డి నాశనం కావాలని, ఆయనకు హాని కలగాలని ప్రార్థిస్తూ ఉమేష్ కుమార్ క్షుద్రపూజలు చేసినట్లు హైదరాబాదులోని ఎల్పీ నగర్‌లో కేసు నమోదైంది. ఈ మేరకు బుధవారం సాయంత్రం తెలుగు టీవీ చానెళ్లలో వార్తలు వచ్చాయి.

టీవీ చానెళ్ల కథనం ప్రకారం - హైదరాబాదులోని ఆర్‌కె పురంలో గల పత్యంగిరి పరమేశ్వరీదేవి ఆలయంలో ఉమేష్ కుమార్ క్షుద్రపూజలు నిర్వహించినట్లు కేసు నమోదైంది. ఈ విషయాన్ని ప్రత్యక్ష సాక్షి సయ్యద్ నౌఫల్ అనే వ్యక్తి ధ్రువీకరించాడు. తాను క్షుద్రపూజలు చేయడం చూశానని అతను చెప్పాడు. మద్యం, మాంసంతో ఉమేష్ కుమార్ క్షుద్రపూజలు చేసినట్లు అతను తెలిపాడు. స్థానిక పోలీసులు ఉమేష్ కుమార్ క్షుద్రపూజల వ్యవహారంపై దర్యాప్తు ప్రారంభించారు. దేవాలయం యజమానిని, పూజారిని వారు ప్రశ్నించినట్లు తెలుస్తోంది.

రాజ్యసభ సభ్యుడి సంతకం ఫోర్జరీ చేసినట్లు ఆరోపణలు ఎదుర్కొంటున్న సీనియర్ ఐపిఎస్ అధికారు ఉమేష్ కుమార్‌ను సస్పెండ్ చేస్తూ ప్రభుత్వం ఇప్పటికే ఉత్తర్వులు జారీ చేసింది. ముందస్తు సమాచారం లేకుండా విధులకు గైర్హాజరవుతున్న కారణంగా ఆయనను సస్పెండ్ చేస్తున్నట్లు ఉత్తర్వుల్లో పేర్కొన్నారు. డిజిపి స్థాయి అధికారిని ప్రభుత్వం సస్పెండ్ చేయడం రాష్ట్ర చరిత్రలో ఇదే ప్రథమం.

రాజ్యసభ సభ్యుడు ఎంఎ ఖాన్ సంతకాన్ని ఫోర్జరీ చేసి డిజిపి దినేశ్ రెడ్డిపై పలు ఆరోపణలు చేస్తూ కేంద్ర హోంశాఖకు రాసిన లేఖ వెనక ఉమేష్ హస్తం ఉందని ఆరోపణలు వచ్చిన విషయం తెలిసిందే. దీనిపై సిఐడి కేసు నమోదు చేసింది. ఈ విచారణలో భాగంగా వ్యక్తిగతంగా హాజరు కావాలంటూ చీఫ్ మెట్రోపాలిటన్ మేజిస్ట్రేట్ పలుమార్లు ఉమేష్‌కు ఆదేశాలు జారీ చేసినా ఆయన బేఖాతర్ చేశారు. దీంతో, జూన్ 14వ తేదీన కోర్టు ఆయనపై నాన్ బెయిలబుల్ వారెంట్ జారీ చేసింది.