నో డౌట్, ముమ్మాటికీ జగన్ కోవర్టే: కెవిపిపై విహెచ్ ఫైర్

న్యూఢిల్లీ: కాంగ్రెసు పార్టీ సీనియర్ నేత, రాజ్యసభ సభ్యుడు కెవిపి రామచంద్ర రావుపై పార్టీకి చెందిన మరో సీనియర్ నేత వి హనుమంత రావు గురువారం తీవ్రస్థాయిలో మండిపడ్డారు. వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి, ఆ పార్టీ గౌరవ అధ్యక్షురాలు, పులివెందుల శాసనసభ్యురాలు వైయస్ విజయమ్మలు దివంగత వైయస్ రాజశేఖర రెడ్డి మృతి వెనుక పార్టీ అధ్యక్షురాలు సోనియా గాంధీ హస్తముందని ఆరోపించినప్పుడు ఆయన ఎందుకు మాట్లాడలేదని ప్రశ్నించారు.

తన తండ్రి హయాంలో వైయస్ జగన్ బాగా సంపాదించారని, ఈ సంపాదన వెనుక కెవిపి హస్తం కూడా ఉందని ఆయన ఆరోపించారు. అక్రమాలతో జగన్ ఎంత సంపాదించారో కెవిపి కూడా అంతకు తక్కువేమీ సంపాదించలేదన్నారు. వైయస్ ఫోటో లేదని వ్యాఖ్యానించడం ద్వారా కెవిపి స్వరూపం ఇప్పుడు బయట పడిందన్నారు. గాంధీ భవనంలో వైయస్ ఫోటోను కార్యకర్తలే తొలగిస్తారన్నారు. మిత్రుడి కోసం కెవిపి అనవసర తాపత్రయానికి పోతున్నారని, మొన్నటి కార్యక్రమంలో వైయస్ ప్రస్తావన అనవసరమని అన్నారు.

కెవిపి ముమ్మాటికి జగన్ కోవర్టే అన్నారు. ఆయన చేసిన వ్యాఖ్యలు కాంగ్రెసు పార్టీకి నష్టం చేసే విధంగా, జగన్‌కు అనుకూలంగానూ ఉన్నాయన్నారు. కాగా రెండు రోజుల క్రితం యువజన కాంగ్రెసు కార్యకర్తల సమావేశంలో కెవిపి వైయస్ ఫోటో లేక పోవడంపై తన అసంతృప్తిని వ్యక్తం చేసిన విషయం తెలిసిందే.

దీనిపై ఇప్పటికే పలువురు స్పందించారు. డిప్యూటీ ముఖ్యమంత్రి దామోదర రాజనర్సింహ, పిసిసి అధికార ప్రతినిధి తులసి రెడ్డి, పిసిసి సభ్యుడు నిరంజన్, నిజామాబాద్ ఎంపీ మధుయాష్కీ తదితరులు కెవిపి తీరుపై ఆగ్రహం వ్యక్తం చేశారు. ఆయన జగన్ కోవర్టు అని ఆరోపించారు.

English summary

Congress party Rajyasabha Member V Hanumantha Rao alleged that KVP Ramachandra Rao is YSR Congress party chief and Kadapa MP YS Jaganmohan Reddy's covert.