కిరణ్ కుమార్‌కు కేంద్రం ఝలక్: ఉమేష్ సస్పెన్షన్‌కు నో

By Srinivas

Published: Friday, August 31, 2012, 9:36 [IST]

హైదరాబాద్: ముఖ్యమంత్రి కిరణ్ కుమార్ రెడ్డికి కేంద్రం ఝలక్ ఇచ్చింది. సీనియర్ ఐపిఎస్ అధికారి ఉమేశ్‌ కుమార్‌కు ఊరట లభించింది. ఆయనను సస్పెన్షన్ చేసిన రాష్ట్ర ప్రభుత్వానికి ఎదురు దెబ్బ తగిలింది. ఉమేశ్‌ను సస్పెండ్ చేస్తూ ఇటీవల రాష్ట్ర సర్కారు జారీ చేసిన ఉత్తర్వులను కేంద్రం తిరస్కరించింది. వాస్తవానికి, అఖిలభారత సర్వీసులకు చెందిన అధికారులను సస్పెండ్ చేసే అధికారం రాష్ట్ర ప్రభుత్వానికి ఉంటుంది. కానీ, ఆ నిర్ణయాన్ని మూడు నెలల్లోపు కేంద్రం ఆమోదించాలి. అయితే, రాష్ట్ర చరిత్రలో తొలిసారిగా రాష్ట్ర ప్రభుత్వం తీసుకున్న సస్పెన్షన్ నిర్ణయాన్ని కేంద్రం తోసిపుచ్చింది. ఉమేశ్ సస్పెన్షన్‌ను వ్యతిరేకించింది.

గతంలో పలువురు ఐఏఎస్, ఐపీఎస్ అధికారులను రాష్ట్ర ప్రభుత్వం సస్పెండ్ చేసినప్పుడు దానిని కేంద్రం ఆమోదించింది. కానీ, ఉమేశ్ సస్పెన్షన్‌పై అందుకు భిన్నంగా స్పందించి ఫైలును గురువారం రాష్ట్రానికి తిప్పిపంపింది. డీజీపీ దినేశ్ రెడ్డిపై అవినీతి ఆరోపణలు చేస్తూ ఒక ఎంపీ పేరిట కేంద్రానికి ఫోర్జరీ లేఖ వెళ్లడంలో ఉమేశ్ పాత్ర ఉందని సీఐడీ కేసు నమోదు చేయడం తెలిసిందే! ఆ కేసు విచారణకు ఆయన హాజరు కాకపోవడంతో నాంపల్లి కో ర్టు అరెస్టు వారెంట్ జారీ చేసింది

తర్వాత ఆయన కోర్టుకు వచ్చి కారణాలు వెల్లడించడంతో వెనక్కి తీసుకుంది. ఈ నేపథ్యంలో విధులకు గైర్హాజరయ్యారని, సర్వీసు రూల్స్‌ను అతిక్రమించారని పేర్కొంటూ రాష్ట్ర ప్రభుత్వం ఉమేశ్‌ను సస్పెండ్ చేసింది. సీనియర్ ఐపీఎస్ అధికారిని సస్పెండ్ చేయడానికి రాష్ట్ర ప్రభుత్వం చూపిన కారణాలు సహేతుకంగా లేవని, ఇంత చిన్న కారణంతో సస్పెండ్ చేయడం సమంజసం కాదని పేర్కొంటూ ఉమేశ్ సస్పెన్షన్‌ను కేంద్రం తిరస్కరించింది. కేంద్రం నిర్ణయం నేపథ్యంలో ఒకట్రెండు రోజుల్లో ఆయన సస్పెన్షన్‌ను ఎత్తివేసి, తిరిగి పోస్టింగ్ ఇవ్వాల్సి ఉంటుంది.

Published On August 31, 2012