మరో ఝలక్: జగన్ ఇల్లు, ఆఫీసుల్లో సిబిఐ సోదాలు

By Pratap

Published: Saturday, October 6, 2012, 10:58 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆస్తుల కేసు దర్యాప్తులో సిబిఐ మరింత దూకుడు పెంచినట్లు అర్థమవుతోంది. వైయస్ జగన్ నివాసంలోనూ కార్యాలయాల్లోనూ సిబిఐ అధికారులు గత మూడు రోజుల పాటు సోదాలు నిర్వహించారు. కోర్టు అనుమతి తీసుకుని వారు ఈ సోదాలు చేశారు. తదుపరి విచారణలో భాగంగా ఈ సోదాలు నిర్వహించినట్లు సిబిఐ అధికారులు చెబుతున్నారు.

ఎస్పీ వెంకటేష్ నేతృత్వంలో సిబిఐ అధికారులు నాలుగు బృందాలుగా ఏర్పడి సోదాలు నిర్వహించారు. జగన్‌కు చెందిన భారతి సిమెంట్స్, జననీ ఇన్‌ఫ్రా కంపెనీల కార్యాలయాల్లో సిబిఐ అధికారులు సోదాలు చేశారు. ఈ సోదాల్లో పలు కీలక పత్రాలను వారు స్వాధీనం చేసుకున్నట్లు తెలుస్తోంది. బినామీ కంపెనీలకు చెందిన పత్రాలు సిబిఐ చేతికి చిక్కినట్లు చెబుతున్నారు.

సిబిఐ అధికారులు ఐదు చోట్ల సోదాలు నిర్వహించినట్లు అధికారికంగా సమాచారం అందుతున్నప్పటికీ 12 చోట్ల సోదాలు నిర్వహించినట్లు తెలుస్తోంది. జగన్ బినామీ కంపెనీల్లోనూ, జగన్ సంస్థల్లో పెట్టుబడులు పెట్టిన కంపెనీల్లోనూ సిబిఐ అధికారులు సోదాలు నిర్వహించే అవకాశాలున్నట్లు తెలుస్తోంది. సాధ్యమైనంత త్వరగా దర్యాప్తును ముగించడానికి ప్రయత్నాలు చేస్తున్నామని, సూట్‌కేసు కంపెనీలపై మరింత సమాచారం సేకరించామని సిబిఐ అధికారులు అంటున్నారు.

వైయస్ జగన్‌కు సుప్రీంకోర్టు బెయిల్ నిరాకరించిన విషయం తెలిసిందే. దర్యాప్తు ముగిసే వరకు బెయిల్ కోసం దరఖాస్తు చేసుకోవద్దని కూడా సుప్రీంకోర్టు వైయస్ జగన్మోహన్ రెడ్డిని ఆదేశించింది. దర్యాప్తు ముగించడానికి సుప్రీంకోర్టు సిబిఐకి గడువు కూడా పెట్టింది. దీంతో గడువులోగా దర్యాప్తు ముగించేందుకు సిబిఐ వేగంగా కదులుతోంది.

Published On October 6, 2012