ఫేస్‌బుక్‌లో రాబర్ట్‌‌వాద్రా వివాదాస్పద వ్యాఖ్య, తొలగింపు

By Srinivas

Published: Tuesday, October 9, 2012, 10:21 [IST]

న్యూఢిల్లీ: ఏఐసిసి అధ్యక్షురాలు సోనియా గాంధీ అల్లుడు రాబర్ట్ వాద్రా ఫేస్‌బుక్‌లో వివాదాస్పద వ్యాఖ్యలు చేశారు. అయితే విమర్శలు వెల్లువెత్తడంతో వాటిని సోమవారం తొలగించారు. అరవింద్ కేజ్రీవాల్ చేసిన ఆరోపణలను కాంగ్రెసు నేతలు, డిఎల్ఎఫ్ ప్రతినిధులు ఖండించారు. వాద్రా కూడా ఫేస్‌బుక్‌లో ఆరోపణలను ఖండించారు. అయితే ఆయన చేసిన వ్యాఖ్యలు వివాదాస్పదమయ్యాయి. బనానా రిపబ్లిక్‌లో మ్యాంగో పీపుల్ అన్నారు. దీనిపై సర్వత్రా విమర్శలు వెల్లువెత్తాయి. దీంతో అతను ఫేస్‌బుక్ నుండి తొలగించారు.

రాజకీయ నేత అవతారమెత్తిన అరవింద్ కేజ్రీవాల్ రాబర్ట్ వాద్రాను ఇప్పుడు చిక్కుల్లో పడేశాడు. అయితే వాద్రా పైన విమర్శలు ఇది తొలిసారి కాదు. విపక్షం పట్టించుకోవడం మాత్రం ఇదే మొదటిసారి. సరిగ్గా ఏడాదిన్నర క్రితం ఓ ఆంగ్లపత్రిక వాద్రా - డీఎల్ఎఫ్ డీల్‌ను బయటపెట్టింది. ఆ వెంటనే భారతీయ జనతా పార్టీ అగ్రనేతలు భేటీ అయ్యారు. మామూలుగా అయితే... కాంగ్రెస్‌పైకి దీనినో ప్రధానాస్త్రంగా ప్రయోగించాలి.

కానీ... కమలనాథులు కిమ్మనలేదు. రాబర్ట్ వాద్రా ఓ ప్రైవేటు వ్యక్తి అని, మన లక్ష్యం సోనియా గాంధీయే కానీ... ఆమె కుటుంబ సభ్యులు కాదని, వ్యక్తిగత దాడులు అటల్ బిహారీ వాజపేయికి కూడా నచ్చదని పార్టీలో చర్చకు వచ్చింది. ఆయపై వచ్చిన ఆరోణల పట్ల మనం ఎలా స్పందించాలి, ఎలా విరుచుకు పడాలి అనే అంశంపై బిజెపి పెద్దలు ఓ ఏకాభిప్రాయానికి రాలేకపోయారు. చివరికి... చేతికి చిక్కిన అస్త్రాన్ని వాడకుండా వదిలేశారు. ఇప్పుడు మాత్రం వాద్రాపై గట్టిగానే విరుచుకుపడుతున్నారు.

Published On October 9, 2012