జగన్ పార్టీలోకి కోమటిరెడ్డి బ్రదర్స్: సంకేతాలిచ్చిన ఎంపి

హైదరాబాద్: రాష్ట్ర ప్రజలు వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి నాయకత్వాన్ని కోరుకుంటున్నారని, సమయం వస్తే ఆయన నాయకత్వానికి మద్దతిస్తామని భువనగిరి పార్లమెంటు సభ్యుడు కోమటిరెడ్డి రాజగోపాల్ రెడ్డి ఆదివారం అన్నారు. నల్గొండ జిల్లాకు చెందిన కోమటిరెడ్డి సోదరులు ఎప్పటికైనా జగన్ పార్టీలో చేరతారనే ప్రచారానికి రాజగోపాల్ రెడ్డి వ్యాఖ్యలు మరింత ఊతమిచ్చాయి.

దివంగత వైయస్ రాజశేఖర రెడ్డి తమకు గాడ్ ఫాదర్ అని, ఆయన అంటే తమకు విపరీతమైన అభిమానమన్నారు. రాష్ట్రంలో కిరణ్ కుమార్ రెడ్డి పాలన అస్తవ్యస్తంగా ఉందన్నారు. దీనికి కాంగ్రెసు పార్టీ అధిష్టానం కూడా ఓ కారణమే అన్నారు. ముఖ్యమంత్రిగా కిరణ్ కుమార్ రెడ్డి స్థానంలో ఎవరు వచ్చినా పరిస్థితి బాగుపడదన్నారు. కేంద్రం గతంలో ప్రకటించిన తెలంగాణ ఇస్తేనే కాంగ్రెసు పార్టీలో కొనసాగుతామని చెప్పారు.

డిసెంబర్ 9వ తేదీలోగా కాంగ్రెసు పార్టీ తెలంగాణకు అనుకూలంగా నిర్ణయం తీసుకోవాలన్నారు. లేదంటే తమ భవిష్యత్తు కార్యాచరణ ప్రకటిస్తామన్నారు. తెలంగాణ ఇస్తేనే కాంగ్రెసు బతికిబట్టకడుతుందన్నారు. అవసరమైతే జగన్‌కు అండగా నిలబడతామన్నారు. వైయస్ సంక్షేమ పథకాలు అమలు కావాలన్నా, రాష్ట్రం బాగుపడాలన్నా జగన్ వల్లే సాధ్యమన్నారు. జగన్‌ను అన్యాయంగా జైలులో పెట్టారన్నారు.

English summary

Bhuvangiri MP Komatireddy Rajagopal Reddy has gave a hint that they will join in YSR Congress.