ఖమ్మం నుండి పోటీకి సిద్ధమా: కెసిఆర్‌కు నామా సవాల్

న్యూఢిల్లీ: ఖమ్మం నుండి పోటీ చేస్తే ప్రజలు ఎవరిని గెలిపిస్తారో చూద్దామా అని తెలుగుదేశం పార్టీ ఖమ్మం పార్లమెంటు సభ్యుడు నామా నాగేశ్వర రావు సోమవారం తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావును ప్రశ్నించారు. న్యూఢిల్లీలో ఆయన మీడియాతో మాట్లాడారు. కెసిఆర్ తెలంగాణ అంశాన్ని అడ్డుపెట్టుకొని రాజకీయాలు చేస్తున్నారని నామా మండిపడ్డారు. ఆయన తీరును ప్రజలు ఎప్పటికప్పుడు గమనిస్తున్నారన్నారు.

కెసిఆర్‌కు తెలంగాణపై చిత్తశుద్ధి ఉంటే వచ్చే ఎన్నికల్లో ఖమ్మం నుండి పోటీ చేయాలని సవాల్ చేశారు. అప్పుడు ప్రజలు ఎవరిని గెలిపిస్తారో చూద్దామన్నారు. ఉద్యమం పేరు చెప్పుకొని డబ్బులు దండుకుంటున్నాడన్నారు. తెలుగుదేశం పార్టీ హయాంలోనే తెలంగాణ అభివృద్ధి జరిగిందని ఆయన అన్నారు. దీనిపై బహిరంగ చర్చకు సిద్ధమా అని కెసిఆర్‌కు నాగేశ్వర రావు సవాల్ విసిరారు.

వైద్యం, విద్య సహా అన్ని రంగాలలో టిడిపి హయాంలోనే అభివృద్ధి చెందాయన్నారు. తెలంగాణలో తమ పార్టీని ప్రజలు నమ్ముతారో లేదో కెసిఆర్ ఖమ్మం నుండి పోటీ చేసేందుకు సిద్ధమైతే తెలుస్తుందన్నారు. నల్గొండ జిల్లా సూర్యాపేట సభలో కెసిఆర్ తెలుగుదేశం పార్టీపై చేసిన విమర్శలను ఆయన తిప్పికొట్టారు.

English summary

Khammam MP Nama Nageswara Rao has challenged TRS chief K Chandrasekhar Rao to contest from Khammam district.