'జయలలిత పెళ్లి చేసుకోకపోవడం వల్లనే అలా...'

బెంగళూరు: తమిళనాడు ముఖ్యమంత్రి జయలలితపై కర్నాటక కాంగ్రెసు పార్టీ నేత సిద్దరామయ్య విచిత్రమైన వ్యాఖ్య చేశారు. కావేరి నది జలాల అంశం కర్నాటక - తమిళనాడు మధ్య చిచ్చు రగిలించింది. ఈ అంశం గురువారం కర్నాటక అసెంబ్లీలో చర్చకు వచ్చింది. ఈ సమయంలో కాంగ్రెసు నేత సిద్ద రామయ్య శాసనసభలో జయలలితపై కామెంట్ చేశారు. ఆమె అంత మొండిగా వ్యవహరించడానికి ఓ కారణముందని చెప్పారు.

జయలలిత అలా ఉండడానికి గల కారణం పెళ్లి చేసుకోకపోవడమే అన్నారు. జయలలిత వైఖరి అసాధరణమని, ఆమె తమిళనాడులో ఎప్పుడైతే అధికారంలో ఉంటుందో అప్పుడు కర్నాటక సమస్యలను ఎదుర్కోవాల్సి వస్తుంటుందని ఆయన ఈ సందర్భంగా అన్నారు.

జయలలిత కేవలం ఒకవైపే ఆలోచించకుండా కర్నాటక రాష్ట్ర సమస్యల పైన కూడా ఆలోచించాలని హితవు పలికారు. నీళ్లు లేక గత రెండేళ్లుగా కర్నాటక కరువు ఎదుర్కొంటుందన్నారు. కానీ రాష్ట్ర ప్రభుత్వం ఇప్పటి వరకు నీటిని విడుదల చేయడం లేదన్నారు. జయలలిత కంటే తమిళనాడు ప్రతిపక్ష నేత, డిఎంకె అధ్యక్షుడు కరుణానిధి హేతుబద్దమైన వ్యక్తి అన్నారు.

సిద్దరామయ్య వ్యాఖ్యలకు మద్దతుగా జెడి(ఎస్) నేత పుత్తరాజు మాట్లాడుతూ... జయలలిత మాండ్యా జిల్లాలోని మెల్కొటేలే జన్మించారని, తాను పుట్టిన గడ్డను ఇప్పటి వరకు ఆమె సందర్శించలేదని ఎద్దేవా చేశారు.

English summary

Congress leader Siddaramaiah has found a reason as to why Tamil Nadu CM Jayalalithaa is adamant when it comes to getting her state's share of the cauvery river water.