గెంటేసినా పార్టీ వీడను: కాసు, కావూరి వెళ్లరు: పితాని

By Srinivas

Updated: Wednesday, January 2, 2013, 15:08 [IST]

Kasu Venkata Krishna Reddy - Pitani Satyanarayana

హైదరాబాద్: తనను పార్టీ నుండి గెంటివేసినా ఇతర పార్టీలోకి వెళ్లే ప్రసక్తి లేదని మంత్రి కాసు వెంకట కృష్ణా రెడ్డి బుధవారం అన్నారు. తనకు టిక్కెట్ ఇచ్చినా ఇవ్వకపోయినా తాను పలుమార్లు ఇతరులను గెలిపించానన్నారు. కాంగ్రెసు పార్టీ తల్లి వంటిది అన్నారు. రాజకీయాల్లో దీర్ఘకాలంగా ఉన్నప్పుడు మంత్రి పదవిని ఆశించడంలో తప్పు లేదని ఏలూరు పార్లమెంటు సభ్యుడు కావూరి సాంబశివ రావు అసంతృప్తిని ఉద్దేశించి అన్నారు.

సరైన సమయంలో పార్టీ అధిష్టానం కావూరికి గౌరవప్రదమైన పదవి ఇస్తుందని తాను ఆశిస్తున్నానని చెప్పారు. ఏకగ్రీవంగా ఎన్నికైన సహకార సంఘాలకు రూ.2 లక్షల ప్రోత్సాహక బహుమతులను ఇస్తామన్నారు. కార్యకర్తల మనోభావాలను వెలికి తీయడం కోసమే విజయవాడలో కాంగ్రెసు పార్టీ సదస్సు నిర్వహిస్తున్నామన్నారు. స్నేహం వేరని రాజకీయాలు వేరన్నారు. ఇతర పార్టీల నేతలతో స్నేహ సంబంధాలు అందరికీ ఉంటాయన్నారు.

తన తనయుడు కాంగ్రెసు పార్టీలో చేరతారనే వార్తలను ఆయన కొట్టి పారేశారు. తన తనయుడు, జగన్ కలిసి చదువుకున్నారని, అందుకే వెళ్లి కలిశాడన్నారు. కానీ జగన్ పార్టీలో చేరరన్నారు. తన కొడుకు రక్తంలోనూ కాంగ్రెసు రక్తమే ఉందన్నారు.

కావూరి విషయం అధిష్టానం...

ఏలూరు పార్లమెంటు సభ్యుడు కావూరి సాంబశివ రావు అసంతృప్తి విషయాన్ని పార్టీ అధిష్టానం చూసుకుంటుందని మరో మంత్రి పితాని సత్యనారాయణ అన్నారు. కావూరి ఏ పార్టీలోకి వెళ్లరన్నారు. ఆయన ఎప్పుడూ కాంగ్రెసు పార్టీలోనే ఉంటారని చెప్పారు. ఆయన ఆవేదన పార్టీ అధిష్టాన విన్నదని చెప్పారు.

ఆయనకు సరైన సమయంలో సరైన ప్రాధాన్యత అధిష్టానం ఇస్తుందని చెప్పారు. రాజకీయాల్లో వలసలు కొత్తేమీ కాదన్నారు. ఎప్పుడూ ఇవి ఉంటూనే ఉంటాయని చెప్పారు. 2014లో కేంద్రంలో, రాష్ట్రంలో కాంగ్రెసు పార్టీయే తిరిగి అధికారంలోకి వస్తుందని ఆయన ఆశాభావం వ్యక్తం చేశారు.

కాంగ్రెసులోకి మళ్లీ వస్తారు

పార్టీని వీడిన వారు తిరిగి వస్తారని జెడి శీలం అన్నారు. విజయవాడ సదస్సులో సమైక్యాంధ్రకు అనుకూలంగా తీర్మానం ఉండదన్నారు. చిరంజీవి పార్టీ పెట్టినప్పుడు కూడా చాలామంది వెళ్లారని, తిరిగి వచ్చారన్నారు.