రాష్ట్రం 30 ఏళ్లు వెనక్కి: కాంగ్రెసుపై బాలయ్య ఫైర్

By Pratap

Published: Tuesday, January 15, 2013, 8:19 [IST]

చిత్తూరు: కాంగ్రెసు పాలనలో రాష్ట్రం 30 ఏళ్లు వెనక్కి వెళ్లిందని నందమూరి హీరో, తెలుగుదేశం పార్టీ నాయకుడు బాలకృష్ణ అన్నారు. చిత్తూరు జిల్లా పుంగనూరులో ఎన్టీఆర్ విగ్రహావిష్కరణ చేశారు. ఆ తర్వాత ప్రజలనుద్దేశించి ప్రసంగించారు. విద్యుత్తు చార్జీలు పెంచి కాంగ్రెసు ప్రభుత్వం ప్రజలపై భారం మోపుతోందని ఆయన సోమవారంనాడు అన్నారు. విద్యుత్తు కోతలతో అన్ని రంగాల ప్రజలు తీవ్ర ఇబ్బందులకు గురువుతున్నారని ఆయన విమర్శించారు.

తెలుగుదేశం పార్టీ అధ్యక్షుడు నారా చంద్రబాబు నాయుడి సొంత ఊరు నారావారిపల్లెలో బాలకృష్ణ, ఆయన అల్లుడు నారా లోకేష్ సందడి చేశారు. ఆదివారంనాడు వారు నారావారిపల్లెకు చేరుకున్నారు. బాలకృష్ణను చూసేందుకు అభిమానులు పెద్ద యెత్తున తరలి వచ్చారు. ప్రజలు పెద్ద సంఖ్యలో రావడంతో తోపులాట చోటు చేసుకుంది.

నారా లోకేష్ వ్యాపార లావాదేవీలను పక్కన పెట్టి సంక్రాంతి పండుగను ఆటవిడుపుగా ఆనందించారు. స్థానికంగా ఉన్న కుర్రాళ్లతో కలిసి ఆయన క్రికెట్ ఆడారు. చంద్రబాబు నాయుడి కుటుంబ సభ్యులు పలువురు క్రికెట్ ఆటలో పాల్గొన్నారు. తెలుగుదేశం శాసనసభ్యులు గాలి ముద్దుకృష్ణమ నాయుడు, బొజ్లల గోపాలకృష్ణా రెడ్డి నారా లోకేష్‌ను కలుసుకున్నారు.

తెలుగుదేశం పార్టీ అధ్యక్షుడు నారా చంద్రబాబు నాయుడు మీకోసం పాదయాత్రలో ఉన్నారు. బాలకృష్ణ రాజకీయాల్లో చురుగ్గా పాల్గొంటున్న నేపథ్యంలో చంద్రబాబుకు అండగా నిలుస్తున్నారు.

Published On January 15, 2013