బాబు వెనుకే బాలయ్యఅడుగు! అమ్మ ఇంట బావ వెంట
చంద్రబాబుతో పాటు రెండు రోజుల పాటు బాలయ్య వస్తున్నా మీకోసం పాదయాత్రలో పాల్గొననున్నారు. బాబు పాదయాత్ర పామర్లు నియోజకవర్గంలో కొనసాగుతోంది. ఇదే నియోజకవర్గంలో బాలకృష్ణ తల్లి స్వగ్రామం కొమరవోలు ఉంది. ఈ గ్రామానికి బాబు పాదయాత్ర సోమవారం చేరుకుంటుంది. తల్లి స్వగ్రామం బాబు యాత్ర చేరుకునే సమయానికి బాలయ్య కూడా పాదయాత్రలో పాల్గొంటారు. ఆదివారం నుండే ఆయన బాబుతో కాలు కదుపుతారు.
మరోవైపు హైదరాబాదులో దివంగత స్పీకర్, మాజీ తెలుగుదేశం పార్టీ నేత జిఎంసి బాలయోగి జయంతి సందర్భంగా తెలుగుదేశం పార్టీ నేతలు ఆయన చిత్రపటానికి పూలమాలలు వేసి నివాళులు అర్పించారు. దేశంలో బాలయోగి వంటి దళితుడిని స్పీకర్గా చేసిన ఘనత తెలుగుదేశం పార్టీదేనని చెప్పారు.
కుప్పంకు నారా లోకేష్
తెలుగుదేశం పార్టీ అధ్యక్షుడు నారా చంద్రబాబు నాయుడు తనయుడు నారా లోకేష్ మూడు రోజుల తర్వాత చిత్తూరు జిల్లా కుప్పం నియోజకవర్గానికి వెళ్లనున్నారు. ఈ నెల 7, 8, 9 తేదీల్లో కుప్పంలో ఉండి పార్టీ నేతలతో సమావేశం అవుతారు. లోకేష్ ఇటీవల కూడా ఓసారి కుప్పం నేతలతో సమావేశమయ్యారు.