ట్రయాంగిల్ లవ్‌స్టోరీ: ఆమె హత్య, మరో యువతి పాత్ర

హైదరాబాద్: ముక్కోణపు ప్రేమ వ్యవహారానికి సానియా అనే యువతి బలైనట్లు తెలుస్తోంది. ఈ నెల 11వ తేదీన కాలిన ముఖంతో గండిపేట సమీపంలోని మొయినాబాద్‌లో ఓ యువతి శవం కనపించిన విషయం తెలిసిందే. హతురాలిని హైదరాబాదులోని మాసాబ్‌ట్యాంక్‌లోని జెఎన్ రెసిడెన్సీకి చెందిన మహ్మద్ అలీ సానియా (18)గా పోలీసులు గుర్తించారు. ఈవెంట్ మేనేజర్‌గా పనిచేస్తున్న సానియా బుధవారం రాత్రి ఏడున్నర గంటలకు హుస్నా అనే యువతి వివాహ వేడుక నిర్వహణ కోసం ఇంటి నుంచి వెళ్లిందని కుటుంబ సభ్యులు చెప్పారు.

ఆ మర్నాడు కూడా సానియా రాకపోవడంతో ఆమె తల్లి హుమాయున్‌నగర్ పోలీసు స్టేషన్‌లో ఫిర్యాదు చేశారు. దాంతో మిస్సింగ్ కేసు నమోదైంది. సానియా తండ్రి షకీల్ విదేశాల్లో ఉంటున్నారు. తల్లి అంజుమ్ తస్నీన్, సోదరితో కలిసి సానియా జెఎన్ రెసిడెన్సీలో ఉంటోంది. బుధవారం రాత్రి సానియా మృతదేహాన్ని ఇంటికి తీసుకుని వచ్చారు.

పోలీసులు అందించిన సమాచారంతో హుమాయున్‌నగర్ పోలీసు స్టేషన్‌కు వెళ్లి దుస్తులను బట్టి సానియా మృతదేహాన్ని ఆమె తల్లి గుర్తించింది. దాంతో మొయినాబాద్‌లో మరణించిన యువతిని సానియాగా పోలీసులు గుర్తించారు. ఉగాది పర్వదినం రోజు సానియా హత్య జరిగింది. ఈ హత్యకు సంబంధించి పోలీసులు ఇద్దరు యువకులను, ఓ యువతిని అరెస్టు చేశారు.

ఈవెంట్ అండ్ ప్రమోషన్ కంపెనీలో పనిచేస్తున్న సహోద్యోగులే సానియాను హత్య చేసినట్లు పోలీసులు నిర్ధారించారు. ఇందుకు సంబంధించి ఓ యువతితో పాటు రియాజ్, మాలిక్‌లను పోలీసులు అదుపులోకి తీసుకున్నారు. సానియా ప్రేమిస్తున్న యువకుడినే ఆ యువతి కూడా ప్రేమిస్తోందని, దానివల్లనే సహోద్యోగులతో కలిసి ఆ యువతి సానియాను హత్య చేయించిందని అంటున్నారు. అయితే, ఆ ప్రేమికుడు ఎవరనేది పోలీసులు గుర్తించడానికి ప్రయత్నిస్తున్నారు.

English summary

An event manager Sania has been murdered in a triangle love story in Hyderabad, police arrested two youths and a girl in this murder case.