వడ్డికాసులవాడు: జగన్‌కు దాసరి దూరమా?

By Pratap

Updated: Sunday, May 5, 2013, 9:14 [IST]

హైదరాబాద్: ప్రముఖ దర్శక నిర్మాత దాసరి నారాయణరావు తలపెట్టిన వడ్డికాసులవాడు సినిమా రాజకీయం రంగంలో చర్చనీయాంశంగా మారింది. ఆ సినిమాపై రాజకీయ రంగంలో తీవ్రమైన ఆసక్తి నెలకొంది. గతంలో చిరంజీవి తీరును వ్యతిరేకిస్తూ దాసరి నారాయణరావు ముఠామేస్త్రి అనే సినిమా తీశారు. ప్రస్తుతం తీయబోతున్న వడ్డికాసులవాడు సినిమాను ఎన్నికలకు ముందు విడుదల చేయడానికి దాసరి నారాయణ రావు ఏర్పాట్లు చేసుకుంటున్నట్లు చెబుతున్నారు.

వడ్డికాసులవాడు సినిమాలో వైయస్ రాజశేఖర రెడ్డికి వ్యక్తిగత సహాయకుడిగా పనిచేసిన సూరీడు పాత్ర ప్రధానంగా ఉంటుందని చెబుతున్నారు. దాసరి నారాయణరావు ఈ పాత్రను పోషిస్తున్నట్లు కూడా చెప్పారు. ఈ సినిమాకు దాసరి నారాయణరావు తన జన్మదినం సందర్భంగా శనివారం శ్రీకారం చుట్టారు. దాసరి నారాయణ రావు వైయస్ జగన్ నాయకత్వంలోని వైయస్సార్ కాంగ్రెసు పార్టీలో చేరుతారని గత కొంత కాలంగా ప్రచారం సాగుతోంది.

వడ్డికాసులవాడు సినిమా వైయస్ రాజశేఖర రెడ్డికి వ్యతిరేకంగా ఉంటుందనే ప్రచారం సాగుతోంది. అటువంటప్పుడు దాసరి నారాయణ రావు జగన్ పార్టీలో చేరడానికి అవకాశం ఉండదని అంటున్నారు. కాంగ్రెసు పార్టీలోకి చిరంజీవి ప్రవేశించిన తర్వాత దాసరి నారాయణరావు ఆ పార్టీకి దూరమయ్యారని, అందువల్ల ఆయన వైయస్సార్ కాంగ్రెసు పార్టీలో చేరుతారని ఊహాగానాలు చెలరేగుతూ వచ్చాయి.

వడ్డికాసులవాడు సినిమాలో వైయస్ రాజశేఖర రెడ్డిని లక్ష్యం చేసుకుంటారా, ఆయన చుట్టూ ఉన్నవారని లక్ష్యం చేసుకుని, వైయస్ రాజశేఖర రెడ్డిని అమాయుకడిగా చూపిస్తారా అనే చర్చ సాగుతోంది. వైయస్ రాజశేఖర రెడ్డిని అమాయకుడిగా చూపించడానికి దాసరి నారాయణ రావు నిర్ణయించుకుంటే జగన్ పార్టీలో చేరడానికి సిద్ధపడినట్లు అర్థం చేసుకోవచ్చునని అంటున్నారు. అయితే, సినిమా విడుదలైతే గానీ ఆ విషయం తెలియదు.

కాగా, సూరీడు పాత్రను పెడుతున్న దాసరి నారాయణ రావు సినిమాలో వైయస్ రాజశేఖర రెడ్డి ఆత్మీయ మిత్రుడు కెవిపి రామచందర్ రావు పాత్రను ఎలా తీర్చిదిద్దుతారనే ఆసక్తి కూడా నెలకొని ఉంది. సినిమాలో తప్పకుండా కెవిపి రామచందర్ రావు పాత్ర ఉంటుందని అంటున్నారు. ప్రభుత్వంలోని పైస్థాయి అవినీతిని ఎండగట్టేందుకు దాసరి నారాయణ రావు ఈ సినిమాను తీస్తున్నట్లు తెలుస్తోంది. మొత్తం మీద, వడ్డికాసులవాడు సినిమా పలు ప్రశ్నలను రేకెత్తిస్తోంది.