ప్రియుడితో కలిసి భర్త హత్య: హెరిటేజ్‌పై హెచ్చార్సీకి

By Srinivas

Updated: Tuesday, May 7, 2013, 16:33 [IST]

హైదరాబాద్/కరీంనగర్: కరీంనగర్ జిల్లాలో దారుణం జరిగింది. ఓ భార్య ప్రియుడితో కలిసి భర్తను హత్య చేసింది. అనంతరం మృతదేహాన్ని గోనెసంచిలో కట్టి బావిలో పడేశారు. విషయం తెలిసిన పోలీసులు అక్కడకు చేరుకుని మృతదేహాన్ని స్వాధీనం చేసుకున్నారు. కేసు నమోదు చేసి విచారణ చేపట్టారు. పశ్చిమ గోదావరి జిల్లాలోని తణుకు మండలం దువ్వ గ్రామంలో ఒక వ్యక్తి తన భార్యను తాగిన మైకంలో కత్తితో పొడిచి చంపాడు.

హెరిటేజ్‌పై హెచ్చార్సీకి

తూర్పు గోదావరి జిల్లా ఎర్రగండిలో ఇద్దరు చిన్నారుల మృతికి హెరిటేజ్ సంస్థ కారణమంటూ బాలల హక్కుల సంఘం మంగళవారం మానవ హక్కుల సంఘాన్ని ఆశ్రయించింది. హెరిటేజ్ సంస్థ పైన క్రిమినల్ కేసును నమోదు చేయాలని తన ఫిర్యాదులో బాలల హక్కుల సంఘం పేర్కొంది. పిటిషన్‌ను విచారణకు స్వీకరించిన హెచ్చార్సీ ఆగస్టు 6వ తేదీలోగా నివేదిక సమర్పించాలని తూర్పు గోదావరి జిల్లా ఎస్పీని ఆదేశించింది. దీనిపై నిన్న పోలీసులు కేసు నమోదు చేసుకున్నారు.

ఆత్మహత్యకు అనుమతించాలని...

రాష్ట్ర రాజధాని హైదరాబాదులోని మారేడుపల్లికి చెందిన ఓ కుటుంబం తమకు ఆత్మహత్యకు అనుమతించాలని మానవ హక్కుల సంఘాన్ని ఆశ్రయించింది. తమను పోలీసులు వేధిస్తున్నారంటూ ఆ కుటుంబం హెచ్చార్సీలో ఫిర్యాదు చేసింది. పోలీసుల వేధింపులు తట్టుకోలేకపోతున్నారని చెప్పారు.

క్రికెట్ బెట్టింగ్ నిర్వాహకుల అరెస్ట్

అనంతపురం జిల్లా హిందూపురం పట్టణంలో ఐపిఎల్6 క్రికెట్ బెట్టింగులకు పాల్పడుతున్న ఐదుగురిని పోలీసులు అరెస్టు చేశారు. వీరి నుండి రూ.60వేల నగదును స్వాధీనం చేసుకున్నారు. ఈ దాడుల్లో సిఐ శ్రీనివాసులుతో పాటు స్పెషల్ పార్టీ పోలీసులు పాల్గొన్నారు.

విశాఖలో బాలిక కిడ్నాప్

విశాఖ నగరంలోని కంచెరపాలెం పోలీస్‌స్టేషన్ పరిధిలో బాలిక కిడ్నాప్ కలకలం సృష్టిస్తోంది. ఈనెల 4న షాపుకు వెళ్లి వస్తుండగా బాలికను దుండగులు కిడ్నాప్ చేశారు. మత్తుమందు చల్లి ఎత్తికెళ్లారని బంధువులకు బాలిక ఫోన్‌చేసి చెప్పినట్లు తెలుస్తోంది. కుటుంబసభ్యుల ఫిర్యాదు మేరకు పోలీసులు కేసు నమోదు చేసి బాలిక కోసం గాలింపు చర్యలు చేపట్టారు.