ఆపరేషన్ 'రియల్': కిషన్ రెడ్డిని టార్గెట్ చేసిన టిఆర్ఎస్!
కిషన్ రెడ్డి ప్రాతినిధ్యం వహిస్తున్న అంబర్పేట నియోజకవర్గం నుంచి దీటైన అభ్యర్థిని రంగంలోకి దించాలని తెరాస అధ్యక్షుడు కల్వకుంట్ల చంద్రశేఖర రావు సన్నిహిత వర్గాలు భావిస్తున్నాయట. తెలంగాణకు అనుకూలమని బిజెపి పదే పదే చెబుతున్న క్రమంలో కిషన్ రెడ్డిపై పోటీకి గట్టి అభ్యర్థి కోసం అధినాయకత్వం వేట సాగిస్తున్నారట.
ప్రస్తుతం ఆ పార్టీ అంబర్పేట నియోజకవర్గం ఇన్చార్జీగా ఉన్న చిట్టెడి నర్సింహా రెడ్డిపై ఎలాంటి ప్రతికూలతలు లేవు. కాకపోతే కిషన్ రెడ్డిని ఢీకొనటం నర్సింహా రెడ్డికి సాధ్యం కాదని భావిస్తున్నారట. ఈ నేపథ్యంలో ఒక రియల్ ఎస్టేట్ వ్యాపారిని కెసిఆర్ బంధువు ఒకరు తెర పైకి తీసుకు వచ్చినట్లుగా ప్రచారం జరుగుతోంది.
ఆర్థిక బలం దృష్ట్యా ఆయనకు టికెట్ ఇవ్వటానికి తెరాస అధిష్ఠానం సానుకూలంగా ఉన్నట్లు ప్రచారం జరుగుతోంది. అందులోభాగంగా చిట్టెడిని బుజ్జగించే యత్నాలను మొదలు పెట్టిందట. అదే జరిగితే పార్టీ నియోజకవర్గ ఇంచార్జీల్లో మరొకరికి మొండిచేయి చూపినట్లే అంటున్నారు.