బిజెపికి ఊహించని షాక్: పదవులకి అద్వానీ రాజీనామా

By Srinivas

Updated: Monday, June 10, 2013, 14:27 [IST]

న్యూఢిల్లీ: భారతీయ జనతా పార్టీకి, గుజరాత్ ముఖ్యమంత్రి నరేంద్ర మోడీకి ఆ పార్టీ అగ్రనేత లాల్ కృష్ణ అద్వానీ అతిపెద్ద షాక్ ఇచ్చారు. సోమవారం ఆయన బిజెపిలోని తన అన్ని పదవులకు రాజీనామా చేశారు. తద్వారా ఆయన పార్టీకి కూడా గుడ్ బై చెప్పినట్లుగానే భావించవచ్చు. నరేంద్ర మోడీని ఎన్నికల ప్రచార కమిటీ చైర్మన్‌గా ఎన్నుకున్న నేపథ్యంలో అసంతృప్తికి గురైన అద్వానీ ఈ రోజు బిజెపిలోని అన్ని పదవులకు గుడ్ బై చెప్పారు.

ఆదివారం వరకు మూడు రోజుల పాటు గోవాలో జరిగిన పార్టీ పదాధికారుల సమావేశానికి అద్వానీ ఆనారోగ్యం పేరుతో దూరంగా ఉన్నారు. ఈ సమావేశాల్లో మోడికి పార్టీ ప్రచార బాధ్యతలు అప్పగించారు. అద్వాని లేకుండా బిజెపి సమావేశాలు జరగడమే ఓ విశేషమంటే.. ఆయన వ్యతిరేకిస్తున్న మోడికి పట్టం గట్టడం మరో విశేషం. ఆర్ఎస్ఎస్ కూడా మోడీకి అనుకూలంగా ఉంది.

తన మాట చెల్లుబాటు కాకపోవడం, ఆర్ఎస్ఎస్ కూడా మోడీకి అనుకూలంగా ఉండటంతో అద్వానీ కినుక వహించారు. తాను లేకుండానే కీలక నిర్ణయాలు తీసుకోవడం, తాను వ్యతిరేకించిన వారికి పట్టం గట్టడం రుచించని ఆయన ఇక కొనసాగడం ఇష్టం లేకే అన్ని పదవులకు రాజీనామా చేశారని చెప్పవచ్చు.

అద్వానీ నిర్ణయంతో ఇరకాటంలో బిజెపి

పార్టీలోని అన్ని పదవులకు అద్వానీ రాజీనామా చేయడంతో బిజెపి అధిష్టానం ఇరకాటంలో పడింది. అద్వానీ వద్దంటున్నా మోడీకి పట్టం కట్టి ఎంత మొండిగా వెళ్లిందో.. ఇప్పుడు అద్వానీ కూడా అంతే కఠినంగా నిర్ణయం తీసుకున్నారని చెప్పవచ్చు.