కెకెకు కీలక పోస్ట్, కెసిఆర్‌కోసం జగన్ 'డమ్మీ' ప్లాన్: బోడ

By Srinivas

Published: Monday, June 17, 2013, 15:16 [IST]

హైదరాబాద్: పదిహేను రోజుల క్రితం కాంగ్రెసు పార్టీ నుండి తెలంగాణ రాష్ట్ర సమితిలో చేరిన సీనియర్ రాజకీయ నాయకుడు కె కేశవ రావుకు ఆ పార్టీ అధ్యక్షుడు కల్వకుంట్ల చంద్రశేఖర రావు సోమవారం కీలక బాధ్యతలను అప్పగించారు. కెకెను జాతీయ వ్యవహారాల కమిటీ చైర్మన్‌గా కెసిఆర్ నియమించారు. అలాగే ప్రధాన కార్యదర్శి బాధ్యతలను కూడా అప్పగించారు. మంగళవారం ఉదయం 11 గంటలకు కెకె బాధ్యతలు స్వీకరించనున్నారు.

కెసిఆర్ కోసం జగన్ డమ్మీ అభ్యర్థులు!: బోడ

తెలంగాణ రాష్ట్ర సమితి కోసం వైయస్సార్ కాంగ్రెసు పార్టీ తెలంగాణ ప్రాంతంలో డమ్మీ అభ్యర్థులను నిలబెట్టే అవకాశముందని ఆ పార్టీ సీనియర్ నేత బోడ జనార్ధన్ అనుమానం వ్యక్తం చేశారు. ఆయన సోమవారం వైయస్సార్ కాంగ్రెసు పార్టీకి రాజీనామా చేశారు. తన రాజీనామా పత్రాన్ని ఆయన పార్టీ కేంద్ర కార్యాలయానికి ఫ్యాక్స్ చేశారు. అదిలాబాద్ కన్వీనర్‌గా ఉన్న బోడతో పాటు సోయం బాబు తదితరులు రాజీనామా చేశారు.

ఈ సందర్భంగా బోడ మాట్లాడారు. తమ కష్టాన్ని పార్టీ గుర్తించలేదని చెప్పారు. తెలంగాణ ప్రాంతంలో తెరాసకు ప్రత్యామ్నాయంగా వైయస్సార్ కాంగ్రెసు పార్టీ ఎదుగుతుందని భావించామన్నారు. కానీ ఆ సూచనలు కనిపించడం లేదన్నారు. వచ్చే ఎన్నికలలో తెరాస, వైయస్సార్ కాంగ్రెసులు కలిసి పని చేసే అవకాశాలున్నాయన్నారు. అందుకే పార్టీ స్థాపించి మూడేళ్లైనా క్యాడర్‌ను అభివృద్ధి చేసుకోలేదని ఆరోపించారు.

పార్టీ వచ్చే ఎన్నికలలో డమ్మీ అభ్యర్థులను నిలిపి, తెరాసకు లబ్ది చేకూర్చే ప్రయత్నాలు చేసే అవకాశముందన్నారు. అందుకే తాను చేసిన సూచనలను పార్టీ అధిష్టానం ఏమాత్రం పట్టించుకోలేదన్నారు. అందుకే తాము రాజీనామా చేస్తున్నట్లు బోడ జనార్ధన్ ప్రకటించారు.

Published On June 17, 2013