మోడీకి ప్రశంస: నితీష్ కుమార్‌కు వీడియో చిక్కులు

By Srinivas

Published: Tuesday, June 18, 2013, 11:22 [IST]

పాట్నా: ఎన్డీయేతో తెగతెంపులు చేసుకున్న జెడి(యు)పై బీహార్ భారతీయ జనతా పార్టీ వీడియోలతో యుద్దానికి సిద్ధమైంది. గుజరాత్ ముఖ్యమంత్రి నరేంద్ర మోడీని బిజెపి ప్రచార కమిటీ సారథిగా నియమించడంపై అలక వహించిన జెడియు నేతలు నితీష్ కుమార్, శరద్ యాదవ్‌లు రెండు రోజుల క్రితం ఎన్డీయేకు రాం రాం చెప్పారు. మోడీ వల్లనే తాము బయటకు వెళ్లిపోతున్నామంటూ ప్రకటించారు.

మోడీ కారణంగా బయటకు వెళ్లిన నితీష్ పైన ఆయన పాత వీడియోలను విడుదల చేసి బీహార్ బిజెపి ఎదురుదాడికి సిద్ధపడింది. గతంలో నితీష్... మోడీపై పొగడ్తల వర్షం కురిపించారు. గోద్రా అల్లర్ల అనంతరం 2003లో నితీష్ ఓ సందర్భంలో మాట్లాడుతూ... మోడీ జాతీయ స్థాయిలో చక్రం తిప్పుతారన్నారు. గోద్రా అల్లర్లు బాధాకరమని చెబుతూనే.. మోడీని పొగిడారు. మోడీని అప్పట్లో నితీష్ పొగిడిన వీడియోలను బిజెపి బయట పెట్టి ఎదుర్కొనేందుకు సిద్ధమైంది.

లౌకికవాదిని: నితీష్

తాను ఎప్పటికీ లౌకికవాదినేనని బీహార్ ముఖ్యమంత్రి, జెడి(యు) అగ్రనేత నితీష్ కుమార్ సోమవారం సాయంత్రం చెప్పారు. తాను లౌకికవాదినని ప్రధానమంత్రి మన్మోహన్ సింగ్ చెప్పడం సంతోషకరమని చెప్పారు. ఈ సందర్భంగా ఆయన ప్రధానికి ధన్యవాదాలు తెలిపారు.

ఎన్డీయేతో జెడి(యు) తెగతెంపులు చేసుకోవడంలో ఎలాంటి దురుద్దేశ్యం లేదని చెప్పారు. దేశ రాజకీయ పరిస్థితుల దృష్ట్యా అలాంటి నిర్ణయం తీసుకోవాల్సి వచ్చిందని నితీష్ కుమార్ చెప్పారు.

అద్వానీని కలిసిన మోడీ

నరేంద్ర మోడీ అగ్రనేత అద్వానీని మంగళవారం కలుసుకున్నారు. బిజెపి ప్రచార కమిటీ సారథిగా ఎంపికైన మొదటిసారి ఆయన అద్వానీని కలిశారు.

Published On June 18, 2013