మావోల రెక్కీ: కెసిఆర్ కుట్ర చేస్తున్నారని మోత్కుపల్లి

By Pratap

Published: Monday, July 8, 2013, 19:34 [IST]

నల్లగొండ/హైదరాబాద్: దళితుడిని అయిన తనను రాజకీయంగా ఎదుర్కోలేక తనను అంతమొందించేందుకు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కుట్ర చేస్తున్నారని తెలుగుదేశం తెలంగాణ ప్రాంత శానససభ్యుడు మోత్కుపల్లి నర్సింహులు ఆరోపించారు. కెసిఆర్ ప్రోద్బలంతోనే తనను హత్య చేయడానికి మావోయిస్టులు రెక్కీ నిర్వహించారని ఆయన అన్నారు.

మోత్కుపల్లిని అంతం చేయడానికి మావోలు రెక్కీ నిర్వహించినట్లు సోమవారం వార్తలు వచ్చాయి. తనను భౌతికంగా అంతం చేయడానికి కెసిఆర్ కుట్ర చేస్తున్నారని ఆయన అన్నారు. తెరాసలో చేరిన మాజీ నక్సలైట్లు తనను హత్య చేసే కుట్రకు సూత్రధారులని ఆయన అన్నారు.

తమ పార్టీ శానససభ్యుడు మోత్కుపల్లి నర్సింహులు హత్యకు మావోయిస్టులు రెక్కీ నిర్వహించినట్లు వచ్చిన వార్తలపై తెలుగుదేశం పార్టీ అధ్యక్షుడు నారా చంద్రబాబు నాయుడు ఆందోళన వ్యక్తం చేశారు. ఈ మేరకు ఆయన సోమవారం ముఖ్యమంత్రి కిరణ్ కుమార్ రెడ్డికి లేఖ రాశారు.

మోత్కుపల్లి నర్సింహులుకు అదనపు భద్రత కల్పించాలని ఆయన ముఖ్యమంత్రిని కోరారు. మోత్కుపల్లిపై రెక్కీ నిర్వహించినవారిని వెంటనే అరెస్టు చేయాలని ఆయన డిమాండ్ చేశారు. మహబూబ్‌నగర్ కోర్టు ఆవరణలో ఎకె 47 అవహరణ కేసుపై విచారణ జరిపించాలని కూడా ఆయన కోరారు.

Published On July 8, 2013