'టి': మోడీ సభలో ఉదయభాను బిజెపిలో చేరుతారా?

హైదరాబాద్: ప్రముఖ యాంకర్, నటి ఉదయభాను భారతీయ జనతా పార్టీ గూటికి చేరే అవకాశాలు లేకపోలేదంటున్నారు. రాజకీయాలు తన ఒంటికి పడవని ఓ వైపు ఉదయభాను చెబుతున్నప్పటికీ ఆమె రాజకీయ ఆరంగేట్రంపై చర్చ మాత్రం సాగుతోంది. మరికొద్ది రోజుల్లో ఆమె బిజెపి తీర్థం పుచ్చుకోవచ్చుననే ప్రచారం ఊపందుకుంది.

వచ్చే నెల 11వ తేదిన గుజరాత్ ముఖ్యమంత్రి, బిజెపి ఎన్నికల ప్రచార సారథి నరేంద్ర మోడీ హైదరాబాద్ రానున్నారు. ఎల్బీ స్టేడియంలో భారీ బహిరంగ జరుగనుంది. ఈ వేదిక పైనే ఆమె బిజెపి తీర్థం పుచ్చుకునే అవకాశాలు ఉన్నాయని అంటున్నారు. ఉదయభాను తెలంగాణ ప్రాంతానికి చెందినవారు. ఆమె బిజెపిలో చేరితే అదే ప్రాంతం నుండి ఎన్నికల బరిలో దింపాలని ఆ పార్టీ కూడా భావిస్తోందని అంటున్నారు.

మరోవైపు ఉదయభానును పార్టీలోకి తీసుకుని రావడానికి తెలంగాణ రాష్ట్ర సమితి (తెరాస) తీవ్రంగా ప్రయత్నాలు మొదలెట్టినట్లు వార్తలు వచ్చాయి. మరికొన్ని పార్టీలు కూడా సమాలోచనలు జరుపుతున్నాయట. ఉదయభానును రాజకీయాల్లోకి తీసుకొస్తే మాత్రం కచ్చితంగా తమకు కలసివస్తుందని కొందరు నేతలు చెబుతున్నారు.

రాజకీయ పార్టీలు ఆమెను రాజకీయాల్లోకి తీసుకు వచ్చే ప్రయత్నాలు చేస్తుండగా, ఆమె తెలంగాణవాద పార్టీలో చేరుతారనే ప్రచారం ఓ వైపు సాగుతుండగా.. ఆమె మాత్రం తాను రాజకీయాలకు సరిపోవని ఉదయభాను చెబుతున్నారు. ఓ పత్రికకు ఇచ్చిన ఇంటర్వ్యూలో రాజకీయాల్లోకి వచ్చే ఆలోచన లేదని ఆమె చెప్పారు.

తనకు కొన్ని రాజకీయ పార్టీల నుండి ఆఫర్స్ వచ్చాయని, ప్రాధాన్యత కలిగిన పదవులు ఇస్తామని చెప్పారని కానీ, తాను అంగీకరించలేదన్నారు. తన కలం ద్వారా సమాజంలోని రుగ్మతల పైన పోరాడదల్చుకున్నట్లు చెప్పారు. తాను రాజకీయాల్లో ప్రవేశించినా తాను ఒక్క దానినే సమాజాంలో మార్పును తీసుకు రాలేనన్నారు. తాను ఫ్రాంక్‌గా ఉంటానని, తాను రాజకీయాలకు సరిపోనన్నారు.. తాను సెన్సిటివ్ వ్యక్తినని చెప్పారు.

English summary

Political parties are trying to woo Udaya Bhanu for support. But she clarified that she is not having interest in politics.