చెకప్ కోసం అమెరికాకు సోనియా: వెంట ప్రియాంక

By Pratap

Published: Monday, September 2, 2013, 20:54 [IST]

న్యూఢిల్లీ: కాంగ్రెస్ అధ్యక్షురాలు సోనియాగాంధీ వైద్య పరీక్షల కోసం అమెరికాకు వెళ్లారు. కూతురు ప్రియాంకతో కలిసి సోమవారం మధ్యాహ్నం ఇక్కడి నుంచి బయలుదేరారు. ఆహారభద్రతబిల్లుపై గత సోమవారం లోక్‌సభలో చర్చ జరుగుతున్న సమయంలో సోనియాగాంధీ అనారోగ్యానికి గురయ్యారు.

గుండెనొప్పి, శ్వాసలో ఇబ్బందులతో ఆమె సతమతమయ్యారు. వెంటనే ఆమెను ఎయిమ్స్‌కు తరలించి చికిత్స చేశారు. పరీక్షలు నిర్వహించిన తర్వాత దగ్గు, తలనొప్పికి తీసుకున్న మాత్రలు రియాక్షన్ ఇవ్వడంతో ఆమెకు ఇబ్బందులు తలెత్తాయని వైద్యులు తెలిపారు.

కాగా, 2011 ఆగస్టు 5న అమెరికాలో సోనియాకు శస్త్రచికిత్స జరిగింది. అనంతరం నిరుడు ఫిబ్రవరి, సెప్టెంబర్ నెలల్లో ఆమె అక్కడకు వెళ్లి పరీక్షలు చేయించుకున్నారు. ఇప్పుడు మళ్లీ అనారోగ్య సమస్యలు తలెత్తడంతో చెకప్ కోసం సోనియా అమెరికా వెళ్లారు.

సోమవారం ఎయిమ్స్‌లో ఐదు గంటల పాటు ఉన్న సోనియాకు వివిధ పరీక్షలు జరిగాయి. ఆ తర్వాత ఆమె డిశ్చార్జీ అయ్యారు.

Published On September 2, 2013