3 నెలల్లో తెలంగాణ: సుప్తచేతనలో ప్రభుత్వం

న్యూఢిల్లీ: తెలంగాణ రాష్ట్ర ఏర్పాటు ప్రక్రియలో కేంద్ర ప్రభుత్వం వేగం పెంచినట్లు తెలుస్తోంది. మూడు నెలల్లోగా తెలంగాణ రాష్ట్రాన్ని ఏర్పాటు చేయాలనే లక్ష్యంతో ముందుకు కదులుతున్నట్లు చెబుతున్నారు. విభజన ప్రక్రియలో ఏ మాత్రం జాప్యం చేయకూడదనే నిర్ణయానికి వచ్చినట్లు సమాచారం. ఈ ఏాడది ఆఖరులో తెలంగాణ రాష్ట్రాన్ని ఏర్పాటు చేయకపోతే తాము ఆశించిన ఫలితాలు రావనే ఉద్దేశంతో కాంగ్రెసు అధిష్టానం ఉన్నట్లు తెలుస్తోంది. మూడు నెలల్లోగా లేదంటే 125 రోజుల్లోగా తెలంగాణ రాష్ట్రాన్ని ఏర్పాటు చేయడానికి ప్రణాళిక సిద్ధం చేసుకున్నట్లు తెలుస్తోంది.

రాష్ట్ర విభజన నేపథ్యంలో సమస్యలు తలెత్తితే ప్రభుత్వాన్ని సుప్తచేతనావస్థలో (సస్పెండ్ యానిమేషన్‌లో) పెట్టి ప్రక్రియను కొనసాగించాలనే ఉద్దేశంతో ఉన్నట్లు సమాచారం. తెలంగాణ ఏర్పాటుకు సంబంధించిన నోట్‌ను రూపొందించి, దానికి సంబంధించిన కాపీని న్యాయశాఖకు పంపించినట్లు సమాచారం. హైదరాబాదును కేంద్ర పాలిత ప్రాంతంగా చేస్తారనే ఊహాగానాలకు కూడా ఆ నోట్ తెర దించినట్లు చెబుతున్నారు.

తెలంగాణ రాష్ట్ర ఏర్పాటు తప్పదని ఎకె ఆంటోనీతో పాటు కేంద్ర మంత్రులు సుశీల్ కుమార్ షిండే, పి. చిదంబరం, కాంగ్రెసు ఆంధ్రప్రదేశ్ వ్యవహారాల ఇంచార్జీ దిగ్విజయ్ సింగ్ సీమాంధ్ర నేతలకు స్పష్టం చేస్తూ ఢిల్లీ సమయం వృధా చేసుకోవద్దని సూచిస్తున్నారు. ఢిల్లీ చుట్టూ తిరుగుతూ సమయాన్ని వృధా చేసుకోవడానికి బదులు సీమాంధ్రలో పార్టీని బలోపేతం చేసే ఆలోచన చేయాలని వారు చెబుతున్నట్లు తెలుస్తోంది.

తెలంగాణ రాష్ట్ర ఏర్పాటుపై పార్టీ అధ్యక్షురాలు సోనియా గాంధీ వెనక్కి తగ్గబోరని కచ్చితంగా చెబుతూ నదీ జలాల పంపిణీ, విద్యుత్తు, తదితర వివాదాస్పద అంశాలను పార్టీ అధిష్టానం, కేంద్రం పరిష్కరిస్తాయని వారు చెబుతున్నారు. హైదరాబాదును కేంద్ర పాలిత ప్రాంతంగా చేసే అలోచన కూడా ఏమీ లేదని అంటున్నారు. సిడబ్ల్యుసి తీసుకున్న నిర్ణయాన్ని యధాతథంగా అమలు చేయడమే ఇప్పుడు చేసే పని అని కాంగ్రెసు వర్గాలంటున్నాయి.

English summary

It is said that Congress high command is in a bid to complete the process to create Telangana state within 3 months.